भंगहा नगरपालिकाको एउटै वडामा ८ वटा सामुदायिक भवनको उदघाटन

टुडेपाटी-
महोत्तरी, असेज १७ गते ।स्थानीयहरुको सार्वजनिक कामकाज तथा उठबसको लागि भंगहा नगरपालिकाको एउटै वडामा नवनिर्मित ८ वटा सामुदायिक भवनको उदघाटन गरिएको छ ।

भंगहा वडा नं. ६ को हतिसर्वा, जमुनिया, जपौल, मनपट्टी, पर्सा टोल, संग्रामपुर लगायत ८ स्थानमा नगरपालिका कार्यालयबाट निर्मित सामुदायिक भवनको शनिबार एक समारोहबिच उदघाटन गरिएको हो ।

भंगहा नगरपालिकाका मेयर संजिव साहको अध्यक्षता तथा लोकतान्त्रिक समाजवादी पार्टीका बरिष्ठ नेता शरतसिंह भण्डारीको प्रमुख आतिथ्य एवं लोसपा प्रदेश २ का संसदीय दलका नेता जितेन्द्र सोनलको विशिष्ट आतिथ्यमा उदघाटन गरिएको छ ।

तीनैजनाले संयुक्त रुपमा आठवटै सामुदायिक भवनको उदघाटन गरेका हुन् । उदघाटन समारोहमा लोसपा प्रदेश सांसदहरु अभिराम शर्मा, रानी शर्मा तिवारी, जैलुन राइन, जानकीरमण साह, भंगहा नगरपालिकाका सबै वडाका वडाध्यक्ष लगायत जनप्रतिनिधिको सहभागिता रहेको थियो ।