सिरहामा ट्रकले किचिएर घाइते युवकको अस्पतालमा शंकास्पद मृत्यु, धर्नामा परिवारजन

टुडेपाटी-

सिरहा, भदौ २३ गते ।

सिरहामा ट्रकमा किचिएका एक युवकको अस्पतालमा शंकास्पद मृत्यु भएको छ । मिर्चैया नगरपालिका ३ का २४ वर्षीय संतोष उराँवको बुधबार दिउँसो अस्पतालमा शंकास्पद मृत्यु भएको हो ।

मिर्चैयास्थित शौर्य सिमेन्ट उद्योग परिसरमा ट्रकमा किचिएका संतोषको उपचारको लागि मिर्चैयास्थित मंगलम अस्पतालमा ल्याइएको थियो । तर, उनको अस्पतालमै ज्यान गएको छ ।

संतोषलाई किच्ने ट्रक र अस्पतालको मालिक एउटै हुन् । संतोष पनि मंगलम अस्पतालका मालिककै अर्को ट्रक चलाउँथे । अपरान्ह खाना खाएर गर्मी छल्न अरुले चलाउने ट्रक तल सुतिरहेको बेला चालकले ट्रक चलाएपछि किचिएर घाइते भएपछि उपचारको क्रममा मंगलम अस्पतालमा मृत्यु भएको प्रहरीले जनाएको छ ।

तर, पीडित परिवारले भने सन्तोषको हत्या भएको आरोप लगाएको छ । मंगलम अस्पतालका सञ्चालक चन्देश्वर साहकै ट्रकले किचेर घाइते भएकाले अस्पतालले नियतवश आफ्नो भतिजाको हत्या गरेको मृतककी काकी सूफलदेवि उराँवको आरोप छ ।

उपचारका लागि बाहिर लाँदा बढी खर्च हुने ठानेर पर्याप्त सेवा सुविधा नभएपनि आफ्नै अस्पतालमा अल्झाएर राखेको र हत्या गरेको उनले आरोप लगाइन् । संतोषको छातिमा टायरको डाम देखिएपनि खुट्टामा धारीलो हतियारले काटिएको जस्तो देखिएको भन्दै घटना रहस्यमय देखिएको मृतकका आफन्तको भनाइ छ ।

संतोषको मृत्यु भइसकेपछि मात्रै अस्पतालले आफूहरुलाई जानकारी गराएको मृतकका भाइ रामकुमार उराँवले बताए । परिवारजनले घटनाको छानविनको माग गर्दै अस्पताल अगाडी धर्ना बसेका छन् । शव अझै अस्पतालमै रहेको छ ।

अस्पतालले भने अस्पतालमा ल्याउनुभन्दा अगाडि नै संतोषको मृत्यु भइसकेको दावी गरेको छ । तर, सीसीटिभी फुटेजमा संतोषले शरीर चलाएको देखिन्छ ।

संतोषलाई किच्ने ट्रकका चालक फारर छन् । घटना सम्बन्धमा अनुसन्धान भइरहेको इलाका प्रहरी कार्यालय मिर्चैयाका डीएसपी राजेन्द्र श्रेष्ठले बताए ।