पर्सामा तरकारी किन्दै गरेकी महिलाको सिक्री लुटपाटमा संलग्न तीनजना प्रहरीको फन्दामा

टुडेपाटी-
पर्सा, जेठ २६ गते ।

पर्सामा तरकारी किन्दै गरेकी महिलाको सिक्री तथा ल्यापटप र मोबाइल लुट्ने तीनजना पक्राउ परेका छन् ।

वीरगञ्ज महानगरपालिका वडा नम्बर ११ श्रीपुर बस्ने ४५ वर्षीया सकुन्तला मेहताले वडा नम्बर ८ घण्टाघरस्थित तरकारी बजारमा तरकारी किन्दै गर्दा उनले घाँटीमा लगाएको सुनको सिक्री लुटिएको थियो ।

उनले लगाएको सिक्री वीरगञ्ज महानगरपालिका वडा नम्बर १६ नग्वा बस्ने १९ वर्षका निरज नट र युवराज रायले लुटिएको हो । पक्राउ परेका दुवैजनालाई अस्थायी प्रहरी पोष्ट घण्टाघरको टोलीले सिक्रीसहित पक्राउ गरेको पर्साका प्रहरी प्रवक्ता एवम् प्रहरी नायब उपरीक्षक ओमप्रकाश खनालले जानकारी दिए ।

उनीहरु लगायतको समूहले विगतदेखि नै जिल्लाको विभिन्न स्थानमा सुनको सिक्री लुटपाट गर्दै आएको प्रहरीकाे दाबी छ ।

पक्राउ परेका दुवै जनालाई चोरी मुद्दामा अदालतबाट पाँच दिनको म्याद थप गराई थप अनुसन्धान भइरहेकाे प्रहरीले जनाएकाे छ ।

यस्तै वीरगञ्ज–११ श्रीपुर बस्ने प्रकाश रौनियारको घरबाट ल्यापटप तथा मोबाइल चोरी गर्ने अर्का एक एकजना पनि पक्राउ परेको छ ।

पर्साको जगरनाथपुर गाउँपालिका–६ बस्ने १९ वर्षका मुन्नाकुमार रामलाई प्रहरीले पक्राउ गरेको हो ।

उनलाई उनकाे घरबाटै रौनियारको चोरी भएको ल्यापटप र मोबाइलसहित प्रहरीले पक्राउ गरेको डीएसपी खनालले बताए ।