पर्सामा जुवा खालबाट २ जना रंगेहात प्रहरीको फन्दामा

टुडेपाटी-
पर्सा, चैत १० गते ।

पर्साको बहुदरमाई नगरपालिकाबाट २ जनालाई जुवाको खालबाट रंगेहात पक्राउ गरिएको छ । पक्राउ पर्नेमा सोही स्थानका ४० वर्षका उमेश राउत कुर्मी र ३० वर्षका लालबाबु प्रसाद छन् ।

जुवा खेल्दै गरेको अवस्थामा बहुदरमाई ९ बिश्रामपुर टोलबाट २१ हजार २ सय ६० रुपैयाँ र तीन बुक ताससहित दुईजनालाई पक्राउ गरेको पर्साका प्रहरी प्रवक्ता एवम् प्रहरी नायब उपरीक्षक ओम प्रकाश खनालले जानकारी दिए ।

बिश्रामपुर टोल बस्ने बेचु साहको मसुरोबारीमा जुवा खेलाइरहेको सूचनाको आधारमा ईलाका प्रहरी कार्यालय पोखरियाबाट खटिएको प्रहरी टोलीले घेरा हाल्ने क्रममा दुई जनालाई पक्राउ गर्न सफल भएको तथा ७ जना जुवाडेहरु फरार भएको उनले बताए ।

फरार भएका जुवाडेहरुको पहिचान भइसकेको र उनीहरुको खोजी भइरहेको खनालले जानकारी दिए । पक्राउ परेका दुई जनालाई सार्वजनिक हित, स्वास्थ्य सुरक्षा, सुविधा नैतिकताविरुद्धको कसुर ( जुवा) मुद्दामा अनुसन्धान प्रक्रिया अघि बढाइएको पर्सा प्रहरीले जनाएको छ ।