वीरगञ्जबाट पौने ८ लाख रुपैयाँसहित एक हुण्डी कारोबारी प्रहरीको फन्दामा

टुडेपाटी-
वीरगञ्ज, फागुन २६ गते ।

वीरगञ्जबाट हुण्डी कारोबारमा संलग्न रहेको आरोपमा एकजनालाई प्रहरीले पक्राउ गरेको छ । पक्राउ पर्नेमा बाराको कलैया उपमहानगरपालिका-२३ बस्ने ३८ वर्षीय जयराम राउत कुर्मी छन् ।

मंगलबार वीरगञ्ज-६ स्थित माँ अम्बे ट्रेडर्सबाट अवैध वित्तीय कारोबार (हुण्डी) भइरहेको सूचना प्रहरीमा आएको थियो । प्रहरीले सोही ट्रेडर्समा काम गर्ने कुर्मीलाई स्रोत खुल्न नसकेको नेपाली ७ सात लाख ७५ हजार ४ सय ७० रुपैयाँ, भारतीय रुपैयाँ ७ हजार ४ सय तथा उनको साथबाट बब्लु राजको नाममा जारी भएको नगद २ लाख र रामप्रसाद पटेलको नाममा जारी भएको ५ लाख ६० हजारको चेकसमेत बरामद गरेको जिल्ला प्रहरी कर्यालय पर्साका प्रवक्ता एवं प्रहरी नायब उपरीक्षक ओमप्रकाश खनालले जानकारी दिए ।

पक्राउ परेका कुर्मीविरुद्ध बैंक तथा वित्तीय संस्थासम्बन्धी ऐन, २०७३ अन्तर्गतको कसूरमा अनुसन्धान अगाडि बढाइएको उनले बताए ।

ट्रेडर्सका सञ्चालक हाल फरार रहेकाले खोजी भइरहेको प्रहरीले जनाएको छ ।