धनुषा : गर्दनमा कुल्हारी प्रहार गरेर अघोरीबाबा फरार

टुडेपाटी–

जनकपुरधाम, भदौ ३० गते ।

धनुषामा एक अघोरीबाबाले एकजनाको गर्दनमा बञ्चरो (कुल्हारी) प्रहार गरी घाइते बनाएका छन् । मिथिला नगरपालिका २ नक्टाझिजका ६० वर्षीय राजकुमार महतोको गर्दनमा अघरोबाबा भन्नेले ज्यानै लिने गरी बञ्चरो प्रहार गरेका हुन् ।

बञ्चरो प्रहारबाट घाइते भएका महतोलाई गर्दनमा एकदर्जन टाका लागेको उनका छोरा ओमप्रकाश महतोले जानकारी दिए ।

धनुषाको क्षीरेश्वरनाथ नगरपालिका ८ दिगम्वरपुर घरका ४० वर्षीय तुल्सी भन्ने अघोरी बाबा केहिमहिनादेखि बसही खोला किनारमा त्रिपाल झुण्ड्याएर बसिरहेका छन् । मंगलबार दिउँसो महतोको खेतमा भएको बाँसी अघोरीबाबा काट्दै गरेको अवसथमा फेला परेपछि दुबैजना बिच समान्य विवाद भएको थियो ।

त्यसै क्रममा ज्यानै लिने गरी महतोको घाँटीमाथि बञ्चरो प्रहार गरी अघोरीबाबा फरार भएको परिवारजनले जनाएको छ ।

उनको खोजी कार्य जारीरहेको ईलाका प्रहरी कार्यालय ढल्केवरले जनाएको छ ।