धनुषाका उद्योगीलाई करोडौँ ठग्ने बिमा कम्पनीको प्रयास, १३ वर्षपछि पेपर मिल्सलाई न्याय

टुडेपाटी-

जनकपुरधाम, साउन ८ गते ।

धनुषाको क्षिरेश्वरनाथ नगरपालिकामा अवस्थित एभरेष्ट पेपर मिल्सले १३ वर्षपछि बिमा रकम पाउने भएको छ ।

लगातार ८ वर्षसम्म प्रिमियम तिरेको एभरेष्ट पेपर मिल्समा २०६० सालमा आगलागी भएको थियो । तर युनाइटेड इन्सुरेन्सले क्षति भएको ५ करोड बराबरको बीमा रकम भुक्तानी गर्न आनाकानी गरिरहेको थियो ।

सर्वोच्च अदालतका न्यायाधीशद्वय विश्वम्भरप्रसाद श्रेष्ठ र हरिप्रसाद फुयालको संयुक्त इजलाशले बुधबार एभरेष्ट पेपर मिल्सको पक्षमा फैसला गर्दै बीमावापतको रकम र त्यसको ब्याजसहित भुक्तानी गर्न निर्देशन दिएको हो ।

सर्वोच्चको उक्त फैसलासँगै एभरेष्ट पेपर मिल्सले न्याय माग्न सुरु गरेको १३ वर्षपछि न्याय पाएको छ । एभरेष्ट पेपर मिल्सका महाप्रबन्धक सन्तोष दाहालले अदालतले १३ वर्षपछि न्याय दिएको भन्दै मिल्स सञ्चालन गर्न अब केही सहज हुने बताए ।

एभरेष्ट पेपर मिल्सले आफ्नो फ्याक्ट्री तथा उत्पादनको बीमा युनाइटेड इन्सुरेन्सबाट गराएको थियो ।
तत्कालीन समयमा माओवादीले २०६० साल भदौ ७ गते एभरेष्ट पेपर मिल्सको धनुषास्थित फ्याक्ट्री, गोदामलगायत स्थानमा आगो लगाएको थियो ।

माओवादीले फ्याक्ट्रीमा बम पड्काउँदै आगो लगाएपछि एभरेष्ट पेपर मिल्सको करिब ११ करोड रुपैयाँको क्षति भएको थियो ।

तर युनाइटेड इन्सुरेन्सले आफूले बीमा गरेको भवनको मात्रै भएको भन्दै ११ करोडको क्षति भएपनि जम्मा ४ करोड ५० लाख रुपैयाँमात्रै भुक्तानी गरेको थियो । २०६० सालमा भएको आगलागीपछि विभिन्न चरणमा छलफल भएपनि बीमा कम्पनीले बीमितलाई रकम क्षति भएको रकमको कटाउने रकमबाहेक पूरै रकम भुक्तानी नगरेपछि एभरेष्ट इन्सुरेन्स अदालतसम्म पुगेको थियो ।

त्यसो त एभरेष्ट पेपर मिल्सलाई माओवादीको बमले उडाएपछि यसले प्रिमियम तिरे अनुसारको बीमा रकम युनाइटेड इन्सुरेन्ससँग माग गरेको थियो । तर युनाइटेड इन्सुरेन्सले क्षति भएर कटाउने रकममध्ये पनि करिब २ करोड रुपैयाँ मिल्सलाई दिएको थिएन ।

तत्कालीन समयमा ११ करोडको क्षति भएपनि बीमा कम्पनीबाट ६ करोड ५० लाख मात्रै बीमा रकम प्राप्त गर्न सकिने गरी क्षतिको मूल्यांकन भएको थियो । उक्त रकम युनाइटेट इन्सुरेन्सले तिर्नुपर्ने भएपनि इन्सुरेन्स कम्पनीले भने जम्मा ४ करोड ५० लाख मात्रै रकम दिइ थप रकम दिन आनाकानी गरेको थियो ।

त्यसपछि पुनरावेदन अदालत पाटनमा एभरेष्ट पेपर मिल्सले मुद्दा दायर गरेको थियो । मिल्सको मुद्दा पुनरावेदन अदालत पाटनका न्यायाधीशद्वय पुरुषोत्तम भण्डारी र प्रकाशकुमार ढुङ्गानाको इजलाशले युनाइटेड इन्सुरेन्सले नै बीमावापतको बाँकी २ करोड रकम पनि भुक्तानी गर्नुपर्ने फैसला गरेको थियो ।

२०६७ साल वैशाख १३ गतेको उक्त फैसला चित्त नबुझेको भन्दै युनाइटेड इन्सुरेन्स सर्वोच्च अदालत पुगेको थियो ।
यस्तै एभरेष्ट पेपर मिल्सलाई तिर्नुपर्ने बीमा वापतको रकम अब युनाइटेड इन्सुरेन्सले पुनर्बीमा कम्पनीबाट पाउने छैन । १५ वर्ष अगाडिको घटना भएको र तत्कालीन समयमा उसले दिन इन्कार गरी नदिएको रकम भएकाले अब उसले पुनर्बीमा कम्पनीबाट बीमा दाबी गर्न नमिल्ने भएकाले इन्सुरेन्सले आफ्नै आम्दानीबाट उक्त रकम भराउनु पर्नेछ ।