धनुषामा युवकको हत्या, बोरामा शव

टुडेपाटी-
जनकपुरधाम, पुस ५ गते ।

धनुषामा हत्या गरी बोरामा राखेर फालेको अवस्थामा एक युवकको शव फेला परेको छ ।
धनुषाको मिथिला बिहारी नगरपालिका–२ पुरन्दाहास्थित परशुराम तलाउ नजिक पुलमुनि बोराभित्र राखिएको अवस्थामा शव फेला परेको हो ।

बिहीबार अपराहन्न सडेगलेको अवस्थामा अन्दाजी ३० वर्षीय युवकको शव फेला परेको धनुषाका प्रहरी प्रवक्ता डीएसपी बरुणबहादुर सिंहले जानकारी दिए ।

घटनास्थलमा अनुसन्धानका लागि तालिम प्राप्त कुकुरसहितको टोली परिचालन गरी शव पोस्टमार्टमको लागि प्रादेशिक अस्पताल जनकपुरमा राखिएको छ ।

डीएसपी सिंहका अनुसार बिहीबार दिउँसो ३ बजेतिर बोराभित्र शव रहेको भन्ने स्थानीयले जानकारी गराएका थिए । मृतकको परिचय खुलेको छैन । घटना विषयमा थप अनुसन्धान गरिरहेको जिल्ला प्रहरी कार्यालय धनुषाले जनाएको छ ।