मधेश प्रदेशः बिजुलीको पोल ढल्दा घरमा क्षति

टुडेपाटी–
सप्तरी, साउन १८ गते ।

सप्तरीमा बिजुली पोल ढल्दा एकजनाको घरमा क्षति भएको छ ।

जिल्लाको सप्तकोशी नगरपालिका १, खोरियाटोलमा गत मंगलबार राति करिब ९ बजे पोल ढल्दा हरिबहादुर खड्काको घरमा क्षति पुगेको हो ।

एक वर्षअघि चट्याङ लागेर जीर्ण अवस्थामा रहेको पोल सामान्य हावा चल्दा ढलेको स्थानीय बताउँछन् ।

पीडित हरिबहादुरका अनुसार पोलमा चट्याङ लागेर जीर्ण अवस्थामा पुगेको र जुनसुकै बेला ढल्न सक्ने विषयमा विद्युत् कार्यालय र वडा कार्यालयमा समेत जानकारी गराइएको थियो । पटकपटक पोल फेरिदिन आग्रह गर्दा समेत बेवास्ता गरिएको उनको गुनासो छ ।

विद्युत् कार्यालयका कर्मचारी र वडा कार्यालयका जनप्रतिनिधिको बेवास्ताका कारण आफ्नो घरमाथि पोल ढलेको उनको गुनासो छ । घटना भवितव्य नभएर बेवास्ताका कारण भएकाले त्यसको क्षतिपूर्ति आफूले पाउनुपर्ने उनको माग छ ।

नेपाल विद्युत प्राधिकरण वितरण केन्द्र कञ्चनपुरका प्रमुख अरुण साहले पुरानो पोल जीर्ण अवस्थामा रहेकोले ढलेको बताउँदै ढलेको ठाउँमा नयाँ पोल गाडेर विद्युत् सुचारु गरिएको जानकारी दिए ।