जनकपुरधाममा एक युवकको शव फेला

टुडेपाटी–
जनकपुरधाम, बैशाख २ गते ।

जनकपुरधाममा एक युवकको शव फेला परेको छ ।

शनिबार बिहान रेल्वे स्टेशनदेखि कपिलेश्वर जाने बाटोमा जलाद खोलाको पुलमुनि युवकको शव फेला परेको हो ।

बिहान करिब १० बजेको समयमा पुलमा ओहोरदोहोर गर्ने यात्रुले युवकको शव देखेपछि प्रहरीलाई खबर गरेका थिए ।

मृतक युवक भारत असामका २४ वर्षीय मोहम्मद इरफान रहेको जिल्ला प्रहरी कार्यालय धनुषाका प्रवक्ता प्रहरी नायव उपरीक्षक बेदप्रसाद गौतमले जानकारी दिए ।

उनी केही दिनयता जनकपुरधाममा आफ्नी सानिआमासँग बस्दै आएका थिए । मृतककी सानिआमा जनकपुरधाम–१६ मा कोठा भडामा लिई बस्छिन् । इरफान जनकपुरधाममा दैनिक ज्यालादारीमा काम गर्थे ।

प्रहरीले मृतक इरफानको शव पोष्टमर्टमका लागि प्रादेशिक अस्पताल जनकपुरधाम राखेको तथा यस सम्बन्धमा थप अनुसन्धान भइरहेको जिल्ला प्रहरी कार्यालयले जनाएको छ ।