महोत्तरीमा आगोमा जलेर घाइते भएकी एक महिलाको मृत्यु

टुडेपाटी–
महोत्तरी, चैत १ गते ।

महोत्तरीमा आगो लागेर घाइते भएका दुईजना मध्ये एकजनाको मृत्यु भएको छ ।

गत शनिबार दिउँसो करिब अढाई बजे बलवा नगरपालिका ४ परौल टोल स्थित बस्ने रामसागर यादवको खपडाको छानो, बाँसको टाटिको बेरा लगाएको १ तले कच्ची भान्सा घरमा बालेको चुल्होबाट अचानक आगो सल्कन गई आगलागी हुँदा दुईजना घाइते भएका थिए ।

घाइतेमध्ये ५० वर्षीया चन्दर देवीको मृत्यु भएको जिल्ला प्रहरी कार्यालय महोत्तरीले जनाएको छ । आगोमा जलेर गम्भीर घाइते भएकी उनको प्रादेशिक अस्पताल जनकपुरमा समान्य उपचार पश्चात थप उपचारको लागि काठमाण्डौ लगिएको थियो । उपचारको क्रममा बुधबार दिउँसो करिब १२ बजे मृत्यु भएको प्रहरी निरीक्षक सरोज राईले जानकारी दिए ।

यस्तै, आगोमै जलेर घाइते भएका ५२ वर्षीय जयकरण यादवको अवस्था मध्यम रहेको तथा काठमाण्डौ उपचार भइरहेको जिल्ला प्रहरी कार्यालय महोत्तरीले जनाएको छ ।