ट्याक्टर दुर्घटनामा परेर चारजनाको मृत्यु

टुडेपाटी–
काठमाडौँ, कार्तिक २ गते ।

ट्याक्टर दुर्घटनामा परेर ताप्लेजुङमा ४ जनाको मृत्यु भएको छ ।

ताप्लेजुङको मैवाखोला गाउँपालिका–४ स्थित याम्फेवा खोला नजिक गए राति ५५५६ नम्बरको ट्याक्टर दुर्घटनामा हुँदा मैवाखोला वडा नम्बर ५ काम्सङ बस्ने वर्ष ३१ का ट्रयाक्टर चालक पासाङ शेर्पा, वर्ष २४ को फुर्वा शेर्पा, मैवाखोला–४ ओदक बस्ने एकाघरका वर्ष २२ को शर्मिला शेर्पा र वर्ष १७ को लाकी शेर्पाको निधन भएको मैवाखोला गाउँपालिका अध्यक्ष विजय प्रकाश वनेमले जानकारी दिए ।

ट्रयाक्टर सडकबाट करिब दुई सय मिटरमुनि झरेको बताइएको छ । घटना स्थलमै चारैजनाको मृत्यु भएको हो ।

अध्यक्ष वनेमका अनुसार ट्रयाक्टर चालक पासाङ र उनका भाइ फुर्वा घरमा आफन्त बिरामी परेकाले तेल्लाबुङस्थित विद्युत्को सवस्टेशनबाट काम्साङ जाने क्रममा थिए भने अन्य दुई जना समेत घरतर्फ फर्किने क्रममा ट्र्याक्टरमा सवार थिए ।