महोत्तरीमा बसमा लुकाएर राखेको ३ किलो गाँजासहित एक युवक पक्राउ

टुडेपाटी-
महोत्तरी, भदौ ८ गते ।

महोत्तरीको बर्दिवासबाट अवैध लागूऔषध गाँजासहित एकजनालाई प्रहरीले पक्राउ गरेको छ ।

सर्लाहीको गोडैता नगरपालिका ११ माधोपुर बस्ने २६ वर्षीय पिताम्वर साहलाई प्रहरीले पक्राउ गरेको हो ।

सोमवार पुर्वपश्चिम लोकमार्ग अन्तर्गत जिल्ला ट्राफिक प्रहरी कार्यालय बर्दिबास महोत्तरीको कार्यालय अगाडि ईलाका प्रहरी कार्यालय तथा जिल्ला ट्राफिक प्रहरी कार्यालय बर्दिबास महोत्तरीबाट संयुक्त रुपमा खटिएको प्रहरी टोलीले विभिन्न सवारी साधनहरुलाई रोकी चेकजाँच गर्ने क्रममा साह अवैध लागूऔषध गाँजासहित पक्राउ परेको इलाका प्रहरी कार्यालय बर्दिवासका डीएसपी रवि रावलले जानकारी दिए ।

पश्चिमबाट पुर्वतर्फ जाँदै गरेको ग. १ ख ९०३० नम्बरको बस रोकी चेकजाँच गर्ने क्रममा बसमा लुकाई छिपाई राखिएको कालो रङको झोलामा प्लाष्टिकभित्र ३ किलो ९६ ग्राम अवैध लागूऔषध गाँजा बरामद भएको उनले बताए ।

साहलाई महोत्तरी जिल्ला अदालतबाट सातदिनको म्याद थप गरी अनुसन्धान भइरहेको प्रहरीले जनाएको छ ।