महोत्तरीमा पसलको भवन फोडेर लाखौंको सामान चोरी गर्ने दुई जना पक्राउ

टुडेपाटी-
महोत्तरी, भदौ १ गते ।

महोत्तरीमा पसलको भवन फोडेर लाखौँका सामान चोरी गर्ने दुई जनालाई प्रहरीले पक्राउ गरेको छ ।

पक्राउ पर्नेमा बर्दिबास नगरपालिका–१४ का २१ वर्षीय नवीन जर्घामगर र २४ वर्षीय शनि महतो रहेका छन् ।

बर्दिबास–१४ स्थित दिनेश कृषि इञ्जीनियरिङ वर्कसपबाट आइतबार राति उनीहरुले सामान चोरी गरेको इलाका प्रहरी कार्यालय बर्दिबासले जनाएको छ ।

इलाका प्रहरी कार्यालयका प्रमुख तथा प्रहरी नायब उपरीक्षक रवि रावलका अनुसार दुवै जनाले वर्कसपबाट जेसिवीको हाइड्रोलिक पम्प पाँच थान, आठ एमएमको प्लेट एक सय ८० किलो, वेल्डिङ रड पाँच कार्टुन, टेबुल पङ्खा लगायतका सात लाख ६५ हजार मूल्य बराबरको सामान चोरी भएको थियो । चोरिएका सामानसहित उनीहरुलाई पक्राउ गरेको रावलले जानकारी दिए ।

जिल्लाका बर्दिबास र गौशाला बजारमा पसल चोरी हुने क्रम बाक्लिएको जनाइएको छ । यसअघि साउन चौथो सातामा मोटरसाइकल चोर्ने गिरोहलाई पनि प्रहरीले पक्राउ गरी अनुसन्धान जारी राखेको छ । सो गिरोहबाट प्रहरीले हालसम्म चार चोरीका मोटरसाइकल बरामद गरिसकेको छ ।