मधेश प्रदेश : एम्बुलेन्सबाट ९० किलो गाँजा बरामद, चालक पक्राउ

टुडेपाटी-
जनकपुरधाम, साउन ३१ गते ।

सिरहामा एम्बुलेन्सबाट ९० किलो गाँजा बरामद भएको छ । गाँजा बरामद भएपछि एम्बुलेन्स चालकलाई प्रहरीले नियन्त्रणमा लिएको हो ।

पूर्वपश्चिम राजमार्ग अन्तर्गत लहान नगरपालिका १ मा को १ च ७५७७ नम्बरको एम्बुलेन्सबाट गाँजा बरामद भएको जिल्ला प्रहरी कार्यालय सिरहाका प्रहरी निरीक्षक रामचन्द्र साहले जानकारी दिए ।

सोमबार राति सवारीसाधन जाँच गर्ने क्रममा एम्बुलेन्सबाट ९० किलो गाँजा बरामद भएको उनले बताए ।

एम्बुलेन्सको पछाडि बिरामी राख्ने भागमा ५ वटा बोरामा प्याक गरेर राखिएको अवस्थामा गाँजा र २८ हजार रुपैयाँ नगद बरामद भएको उनको भनाइ छ ।

गाँजा बरामद भएपछि एम्बुलेन्स चालक सिरहाको धनगढीमाई नगरपालिका ९ बस्ने २९ वर्षीय सरोज लामालाई प्रहरीले नियन्त्रणमा लिएको छ । यसबारे थप अनुसन्धान भइरहेको इलाका प्रहरी कार्यालय लहानले जनाएको छ ।