सर्लाही : बोर्डरबाट खैरो हिरोइन र स्रोत नखुलेको करिब १८ लाख रुपैयाँसहित युवक पक्राउ

टुडेपाटी-
सर्लाही, साउन ५ गते ।

सशस्त्र प्रहरीले नेपाल-भारत सीमाबाट लागूऔषधको रुपमा रहेको खैरो हिरोइनसहित एकजनालाई पक्राउ गरेको छ ।

पक्राउ पर्नेमा बागमती नगरपालिका–१० का २३ वर्षीय सुमन विक रहेका छन् ।

उनको साथबाट ५ ग्राम २ सय ७० मिलिग्राम खैरो हिरोइनसहित स्रोत नखुलेको १७ लाख ८२ हजार ५ सय रुपैयाँ र ३ थान मोबाइल बरामद गरिएको सशस्त्र प्रहरी १० नम्बर गणका गणपति प्रहरी उपरीक्षक भरत खनियाँले जानकारी दिए ।

उनका अनुसार विकको साथबाट ठूलो मात्रामा बरामद भएको रकमको स्रोत खुलेको छैन ।

विक बुधबार साढे ११ बजे राति भारतबाट नेपालतर्फ आउँदै गर्दा सशस्त्र प्रहरीले नियन्त्रणमा लिएका हुन् । भारतबाट अबेर राति प्रदेश–२–००६ प ३४५१ नम्बरको मोटरसाइकलमा नेपाल आउँदै गर्दा बीओपी बारा उधोरणबाट खटिएको टोलीले शंका लागेर जाँच गर्दा खैरो हिरोइनसहित स्रोत नखुलेको रकम बरामद भएको खनियाँले बताए ।

पक्राउ परेका विकसहित लागूऔषध र मोटरसाइकल थप अनुसन्धानका लागि जिल्ला प्रहरी कार्यालयमा बुझाइएको छ । रकम भने मलंगवा भन्सार कार्यालयमा बुझाइएको सशस्त्र प्रहरीले जनाएको छ ।