मधेश प्रदेशमा ११ प्रतिशत क्षेत्रफलमा धान रोपाइँ सम्पन्न

टुडेपाटी–
जनकपुरधाम, असार १५ ग्ते ।

मधेश प्रदेशमा ११ प्रतिशत धान रोपाइ भएको छ । असार १५ गते अर्थात बुधवार देशभर धान दिबस मनाइ रहँदा मधेश प्रदेशमा यस अवधिमा ११ प्रतिशत मात्र धान रोपाइ भएको हो ।

सबैभन्दा बढी पर्सामा २० प्रतिशत र सबैभन्दा कम धनुषामा ४ प्रतिशत क्षेत्रफलमा रोपाइँ भएको भूमि व्यवस्था तथा कृषि मन्त्रालयले जनाएको छ ।

मधेशमा अहिलेसम्म ४३ हजार ८ सय हेक्टर क्षेत्रफलमा रोपाइँ सकिएको मन्त्रालयका बाली विकास अधिकृत मनिष कुमार पालले बताए ।

पर्सामा ५४ हजार ७३२ हेक्टर क्षेत्रफल खेतीयोग्य जग्गामध्ये ४७ हजार १३० हेक्टर क्षेत्रफलमा धान रोपाइँ हुने गरेको छ भने अहिलेसम्म ९ हजार ४२६ हेक्टरमा धान रोपाई सम्पन्न भएको उनले बताए ।

त्यस्तै सप्तरीमा कुल ८१ हजार ६६८ हेक्टर खेतीयोग्य जग्गामध्ये ६८ हजार हेक्टर क्षेत्रफलमा धान रोपाइँ हुने गरेको छ भने अहिले १० हजार २ सय हेक्टर क्षेत्रफलमा रोपाइँ भएको छ ।

यस्तै सिरहामा ७ हजार ५६० हेक्टर, महोत्तरीमा ४ हजार ६५० हेक्टर, बारामा ४ हजार ६०२ हेक्टरमा धान रोपाइँ सम्पन्न भएको मन्त्रालयको तथ्यांकमा उल्लेख छ ।

यस्तै रौतहटमा २ हजार ६६७ हेक्टर, सर्लाहीमा २ हजार ३३५ हेक्टरमा रोपाइँ सम्पन्न भएको तथ्यांकमा उल्लेख छ ।

धनुषामा ७६ हजार ५३१ हेक्टर क्षेत्रफलको खेतीयोग्य जग्गामध्ये ५९ हजार हेक्टरमा धान रोपाइँ हुनुपर्नेमा अहिलेसम्म २ हजार ३६० हेक्टरमा मात्रै रोपाइँ भएको बाली विकास अधिकृत पालले बताए ।