भैंसी चराउने बहानामा लागुऔषधसहित सप्तरीमा युवक पक्राउ

टुडेपाटी-

सप्तरी, वैशाख ३ गते ।

सप्तरीमा लागुऔषधसहित एक जना पक्राउ परेका छन् । सप्तरीको खड्क नगरपालिका ९ बस्ने १८ वर्षीय मोहमद आडिजलाई पक्राउ गरेको हो ।

भारतबाट गाईभैंसी चराउने बहाना गरी नेपाल प्रवेश गर्दै गरेका आडिजलाई सशस्त्र प्रहरी बल नेपाल बोर्डर आउट पोष्ट सुवर्णपट्टीबाट खटिएको एपीएफ टोलीले जाँच गर्दा उक्त परिमाणको लागुऔषध फेला परेपछि अडिजलाई पक्राउ गरिएको बताइएको छ ।

पक्राउ परेका अडिजलाई बोधेबर्साईन नगरपालिका ९ देउरीस्थित सुवर्णपट्टी ईलाकाबाट ३ बोतल डाईलेक्स र ३ पत्ता नाईट्रोभेट ट्याब्लेटसहित पक्राउ गरेको सशस्त्र प्रहरीले जनाएको छ ।

पक्राउ परेका आडिजलाई बरामद लागूऔषधसहित आवश्यक कारवाहीको लागि स्थानीय प्रहरीमा बुझाईएको छ ।