सर्लाहीमा फरार अभियुक्त पक्राउ गर्न पुगेका प्रहरीमाथि आक्रमण

टुडेपाटी-
सर्लाही, चैत ५ गते ।

सर्लाहीमा फरार अभियुक्त पक्राउ गर्न पुगेको प्रहरीमाथि आक्रमण भएको छ ।

लालबन्दी नगरपालिका वडा नम्बर १२ र १३ को सीमामा पर्ने झोलुङ्गे पुलमा पत्थरकोट प्रहरी चौकीका इन्चार्ज प्रहरी नायव निरीक्षक (सई) रामएकबवाल यादवमाथि आक्रमण भएको हो ।

बिहीबार राति फरार अभियुक्तलाई समात्न जाने क्रममा उनीमाथि स्थानीय युवाहरुले आक्रमण गरेको सर्लाही प्रहरी प्रमुख एसपी कृष्ण प्रसाईंले जानकारी दिए ।

घाइते यादवको काठमाडौंस्थित नेपाल प्रहरी अस्पतालमा उपचार भइरहेको छ ।

आक्रमण गर्ने समूह फरार भएको र उनीहरुको खोजी भइरहेको एसपी प्रसाईंले बताए ।