महोत्तरीमा आठ कठ्ठामा लगाइएको गाँजा खेती नष्ट, खेती गर्नेहरु फरार

टुडेपाटी-
महोत्तरी, फागुन १९ गते ।

आठ कठ्ठा जग्गामा लगाइएको प्रतिवन्धित गाँजा खेती प्रहरीले नष्ट गरेको छ ।

महोत्तरीको एकडारा गाउँपालिका ३ अजमरपट्टी बस्ने गंगा मण्डल, चेतन मण्डल, श्यामसुन्दर मण्डल, दिनेश मण्डल, नागेन्द्र मण्डल र गणेश मण्डलले आफ्नै खेतमा अबैध रुपमा लगाएको गाँजा खेती नष्ट गरेको प्रहरीले जनाएको छ ।

विशेष सुचनाको आधारमा जिल्ला प्रहरी कार्यालय महोत्तरी तथा प्रहरी चौकि नैन्हीबाट गएको ११ जनाको संयुक्त प्रहरी टोलीले आठ कठ्ठा जग्गामा लगाएको गाँजा नष्ट गरेको हो ।

आठ कठ्ठामा करिब ४ हजार १ सय गाँजाको बोट फडानी गरी स्थानीय भद्रभलादी, स्थानीय जनप्रतिनिधिहरुको रोहबरमा जलाएर नष्ट गरेको महोत्तरीका प्रहरी प्रवक्ता डिएसपी प्रकाश विष्टले जानकारी दिए ।

गाँजा खेती गर्ने मानिसहरु फरार रहेकोले र उनीहरुको खोजिकार्य भइरहेको जिल्ला प्रहरी कार्यालय महोत्तरीले जनाएको छ ।