मधेश प्रदेश : माछा बोक्ने गाडीको ड्रमबाट १२६ केजी गाँजा बरामद

टुडेपाटी–
जनकपुरधाम, फागुन ७ गते ।

सर्लाहीमा एक क्विन्टल भन्दा बढी लागुऔषध गाँजा सहित दुई जना पक्राउ परेका छन् ।

पक्राउ पर्नेमा गाडी चालक धादिङको सिदुलेख गाउँपालिका–६ का २२ वर्षीय सुरेन्द्र बि.क. र गाडीमा सवार मकवानपुरको कैलाश गाउँपालिका–२ का ४८ वर्षीय भिमलाल मोक्तान रहेको जिल्ला प्रहरी कार्यालय सर्लाहीले जनाएको छ ।

सूचना अधिकृत प्रहरी निरीक्षक कृष्ण गिरीले विशेष सूचनाको आधारमा शनिवार विहान लालबन्दी नगरपालिका–१ बावानि हेल्थ केयर अगाडी पुर्व पश्चिम लोक मार्गमा पश्चिमबाट पुर्व तर्फ आउँदै गरेको प्र ३–०१–०२४ च ७५९१ नम्बरको माछा बोक्ने पिकअप गाडीबाट लागुऔषध गाँजा बरामद गरेको जानकारी दिए ।

पिकअपमा माछा बोक्ने पहेलो ड्रम भित्रबाट १२६ केजी गाँजा बरामद गरिएको प्रहरी निरीक्षक गिरीले जानकारी दिए ।

प्रहरीले तिनीहरुको साथबाट ८५ हजार नगर समेत बरामद गरेको र थप अनुसन्धान थालेको जिल्ला प्रहरी कार्यालय सर्लाहीले जनाएको छ ।