मधेश प्रदेश : ठुलो मात्रामा लागुऔषध सहित तीनजना पक्राउ

टुडेपाटी–
जनकपुरधाम, माघ ७ गते ।

सप्तरीबाट ठुलो परिणाममा लागुऔषध सहित तीनजना युवा पक्राउ परेका छन् ।

सप्तरीको तिरहुत गाउाँपालिका वडा नं. ५ का २७ वर्षीय राज कुमार मेहता, १९ वर्षीय सिन्धु सदा र अग्निसाईर कृष्णसवरण गाउँपालिका वडा नं. ६ का २५ वर्षीय बैजु साहलाई पक्राउ गरिएको जिल्ला प्रहरी कार्यालय सप्तरीका प्रहरी प्रवक्ता प्रहरी नायव उपरीक्षक माधव प्रसाद काफ्लेले जानकारी दिए ।

बिहिवार राति करिब १० बजेको समयमा तीनै जनालाई छिन्नमस्ता गाउँपालिका वडा नं. १ बरही स्थित पूर्व पश्चिम कोशी कर्णाल पम्प नहरको बाटोबाट पक्राउ गरिएको छ ।

को.२३ प २७७३ नम्बरको मोटरसाईकललाई चेक जाँच गर्दा डाइलेक्स डिसी लेखिएको १०० एमएलको १ सय ९० बोतल, डाइजेपाम २ एमएल लेखिएको ९५ वटा इन्जेक्सन, फेनारगन २ एमएल लेखिएको इन्जेक्सन ९५ एम्पुल, लिगेसिक २ एमएल इन्जेक्सन ९५ एम्पुल बरामद गरिएको प्रवक्ता काफ्लेले जानकारी दिए ।

यस सम्बन्धमा थप अनुसन्धान भइरहेको जिल्ला प्रहरी कार्यालय सप्तरीले जनाएको छ ।