वन कार्यालय मिर्चैयाका प्रमुख यादव सेवाग्राहीसंग घुस लिने गरेको खुलासा (भिडियो

विनय यादव-
सिरहा, मंसिर १५ गते ।

सव डिभिजन वन कार्यालय मिर्चैयाका प्रमुख सत्यनारायण यादवले सिफारिकका लागि सेवाग्राहीसंग हाकाहाकी घुस लिने गरेको रहस्य खुलेको छ । काठ फर्निचर उद्योग संचालन लगायतको सिफारिसको लागि प्रमुख यादवले घुस नै लिने गरेको भिडियो नै सर्वजनिक भएको हो ।

मिर्चैया नगरपालिका १० का अशोक कुमार यादवले काठ फर्निचर उद्योग सञ्चालनका लागि सिफारिस लिन पुग्दा प्रमुख यादवले १५ हजार रुपैयाँ घुसमागेको भिडियो बाहिर आएको हो ।

अशोक यादवले फर्निचर उद्योग सञ्चालनका लागि घरेलु तथा साना उद्योग कार्यालय लहानमा निवेदन दिए । घरेलुले डिभिजन वन कार्यालय सिरहा लहानलाई उद्योग सञ्चालनका लागि भनिएको ठाउँमा मापदण्ड अनुसार सञ्चालन गर्न मिल्ने वा नमिल्ने भनी सिफारिस गरेर पठाउन भन्यो । डिभिजन वन कार्यालय लहानले सव डिभिजन वन कार्यालय मिर्चैयालाई नापजाँच गरी उपयुक्त रहेको वा नरहेको व्यहोरा लेखेर पठाइदिन पत्र काट्यो ।

अशोकले मिर्चैया १० पिपरा र मथिलेश्वरको बीचमा सव मिल उद्योग सञ्चालन गर्न अनुमति मागेका थिए । वन पैदावारमा आधारित उद्योग स्थापनाका लागि मन्त्रीपरिषद्को २०७१ भदौ १६ गतेको बैठकले तोकेको मापदण्ड अनुसार सव मिल उद्योग सञ्चालनका लागि चुरे, भित्री मधेश तथा तराई क्षेत्रमा सार्वजनिक वनभन्दा ३ किलोमिटर परको ठाउँ हुनुपर्छ ।

सबै कागजात ठिकठाक थियो । तर, सव डिभिजन वन कार्यालय मिर्चैयाका प्रमुख यादवले सिफारिकका लागि १५ हजार रुपैयाँ अतिरिक्त मागे । जुन दृश्य भिडियोमा कैद छ । उनले आफूलाई १५ हजार अतिरिक्त रकम दिए मात्रै काम अघि बढ्ने भन्दै तत्कालै सिफारिस दिएनन् ।

सो भिडियामा प्रमुख यादवले आफूलाई पैसा दिए काम अघि बढ्ने र १५ हजारबाट १० हजार आफूले राख्ने, ३ हजार नक्सा बनाउनेलाई दिने र बाँकी २ हजारबाट हजार पाँच सय गरी आफ्ना कर्मचारीहरुलाई दिने बताएका छन् ।

यसरी मागिरहेका छन् वन प्रमुख यादवले घुस -भिडियो

प्रमुख यादवले त्यति बेला शंका लागेपछि पैसा नलिएर भोलिपल्ट बिहान अरुलाई पैसा लिएर पठाउन वा आफ्नो मान्छे कहाँ छोडिदिन सुझाए दिएका छन् ।

उनले आफुले लिएको १५ हजार घुस रकम बारे कसैलाई नभन्न पीडितलाई चेतावनी पनि दिएको भिडियोमा देखिन्छ । कतै भनेको कुरा आफूले थाहा पाए कामै नहुने पनि उनले चेताएका छन् ।

पत्रकारले यो कुरा जानकारी पाएको थाहा पाएपछि प्रमुख यादवले पीडितलाई फकाउन अनेक प्रयासमा लागेका छन् ।

यहाँ रहेका काठ फर्निचर उद्योगहरुमा वनबाट चोरी पैठारी गरी ल्याइएको प्रतिबन्धित काठहरु खुल्लेआम खरिद बिक्री हुन्छ । वनका कर्मचारीहरु यसबाट अनभिज्ञ छैनन् । तैपनि उनीहरुकै आर्थिक मिलेमतोमा काठको अवैध कारोबार भइरहेको छ । प्रमुख यादवले हाम्रो स्टिंग अपरेशनका क्रममा भने अनुसार पनि उनीहरुकै मिलेमतो यो कारोबार भइरहेको प्रष्ट हुन्छ ।

उनले फर्निचर उद्योग सञ्चालन गर्ने भए वनसँग मिलेर बस्नुपर्ने अन्यथा उद्योग नचल्ने बताएका छन् ।