धनुषामा करिब पौने दुई लाख रकम सहित जुवा खालबाट दुईजना पक्राउ

टुडेपाटी–
जनकपुरधाम, मंसिर ६ गते ।

धनुषामा जुवाखालबाट दुईजना करिब पौने दुई लाख रकम सहित पक्राउ परेका छन् । जिल्लाको मिथिला नगरपालिका वडा नं. ११ बाहुनमारा स्थित मान बहादुर थापाको गोठ घरमा जुवा खेल्ने दुईजनालाई पक्राउ गरिएको इलाका प्रहरी कार्यालय ढल्केवरले जनाएको छ । जुवा खेल्ने अन्य १०/१२ जना फरार भएका छन् ।

पक्राउ पर्नेमा सर्लाहीको चन्द्र नगरपालिका वडा नं. ६ का ६० वर्षीय लक्ष्मी राउत र सोही स्थान घर भई हाल जनकपुरधाम उपमहानगरपालिका वडा नं. ८ बस्दै आएका ५१ वर्षीय फेकन चौधरी रहेका छन् ।

दुबै जनालाई आज विहान करिब १ बजेको समयमा गोप्य सूचनाको आधारमा इलाका प्रहरी कार्यालय ढल्केवरबाट खटेको प्रहरी टोलीले घेरा हाली नियन्त्रणमा लिन खोज्दा १०/१२ जना पुरुष भागी फारार भएको र तिनीहरुको खोजबिन भइरहेको इप्रका ढल्केवरका प्रमुख प्रहरी निरीक्षक प्रदिप सुवेदीले जनाएको छ ।

प्रहरीले जुवाको खालबाट १ लाख ६६ हजार ३०५ रुपैयाँ बरामद गरेका छन् ।