प्रदेश २ : ट्याक्टर सैलुनमा छिर्दा १ जनाको मृत्यु

टुडेपाटी–
जनकपुरधाम, कार्तिक २९ गते ।

कपाल काट्ने सैलुनमा ट्याक्टर छिर्दा सप्तरीमा एक महिलाको मृत्यु भएको छ । सोमबार दिउँसो करिब सावा तीन बजे जिल्लाको खडक नगरपालिका वडा नं. ७ कल्याणपुर चोक स्थित बस बिसौनी छेउमा रहेको सैलुनमा ट्याक्टर छिर्दा एकजनाको मृत्यु र चार जना घाइते भएको जिल्ला प्रहरी कार्यालय सप्तरीका प्रहरी प्रवक्ता प्रहरी नायव उपरीक्षक माधव प्रसाद काफ्लेले जानकारी दिए ।

मृत्यु हुनेमा गम्भिर घाइते भएकी खडक नगरपालिका वडा नं. ६ चकवाकी ७० वर्षीया अनारदेवी पासवान रहेी छिन् । उनको उपचारको क्रममा गजेन्द्रनारायण सिंह सगरमाथा अस्पतालमा मृत्यु भएको प्रवक्ता काफ्लेले जानकारी दिए ।

पुर्वबाट पश्चिमतर्फ जाँदै गरेको स १ त ७०१९ नम्बरको ट्याक्टर आफै अनियन्त्रित भई रोडको दक्षिण साईडमा रहेको सैलुनमा छिरेको थियो ।
सो दुर्घटनामा वडा नं. ९ लालपट्टीका ४५ वर्षीय श्याम ठाकुर, ३५ वर्षीय किसुनलाल ठाकुर, राजविराज नगरपालिका वडा नं. ९ मलेठका ३५ वर्षीय रविन्द्र ठाकुर, ट्याक्टर चालक खडक नगरपालिका वडा नं. ६ का २३ वर्षीय अर्जुन चौधरी घाइते भएका छन् ।

घाइते मध्ये श्याम ठाकुरको अवस्थ गम्भिर रहेको र थप उपचारको लागि विराटनगर रिफर गरिएको प्रवक्ता काफ्लेले जानकारी दिए ।