बारा र पर्सामा करेन्ट लागेर भारतीय मजदुरसहित दुईजनाको ज्यान गयो

टुडेपाटी-
जनकपुरधाम, असोज २० गते ।

बारा र पर्सामा करेन्ट लागेर दुईजनाको ज्यान गएको छ । वीरगञ्जको सर्वोत्तम स्टिल प्रालिमा कार्यरत एक भारतीय मजदूरको करेन्ट लागेर ज्यान गएको हो ।

मृत्यु हुनेमा वीरगञ्ज महानगरपालिका–२२ जगरनाथपुरस्थित सर्वोत्तम स्टिल प्रा.लिमा काम गर्ने भारतीय कामदार १६ वर्षीय सचिन कुमार रहेका छन्
।

मंगलबार कारखानामा रहेको गेलेन्डर मेशिन चलाउने क्रममा अचानक विद्युत् सर्ट भइ करेन्ट लाग्दा उनी गम्भीर घाइते भएका थिए । घाइते भएका सचिनको उपचारको क्रममा वीरगञ्जको बयोद्धा अस्पतालमा मंगलबार दिउँसो मृत्यु भएको पर्साका प्रहरी प्रवक्ता एवं प्रहरी नायब उपरीक्षक ओम प्रकाश खनालले जानकारी दिए ।

शवलाई पोष्टमार्टमका लागि अस्पतालमै राखिएको खनालले बताए ।

सर्वोत्तम स्टिलमा गत भदौ १० गते फलाम गलाउने सिसिएम भट्टी विस्फोट हुँदा जलेर १५ जना घाइते भएका थिए । तीमध्ये पाँच जना भारतीय मजदूरको पटनामा उपचारको क्रममा मृत्यु भएको थियो ।

त्यस्तै पानी तान्ने मोटर चलाउने क्रममा करेन्ट लागेर बारामा बुधबार एकजनाको मृत्यु भएको छ ।

करेन्ट लागेर बाराको महागढीमाई नगरपालिका– ८ ब्रम्हपुरी टोल बस्ने ५० वर्षका रामेश्वर महतोको मृत्यु भएको हो ।

बारीमा रहेको पानी तान्ने मोटरमा जडान गरिएको तारबाट करेन्ट लाग्दा उनको घटनास्थलमै मृत्यु भएको बाराका प्रहरी प्रवक्ता तथा प्रहरी नायव उपरीक्षक गौतम मिश्रले जानकारी दिए ।