रौतहटमा नकाबधारी डाँका समूहद्वारा लाखौंको सम्पत्ति लुटपाट

टुडेपाटी-
रौतहट, भदौ २२ गते ।

रौतहटमा लाखौं मूल्य बराबरको सरसमान लुटेर लगेका छन् । रौतहटको दुर्र्गा भगवती गाँउपालिका–३ मत्सरीमा स्थानीय सरोजानन्द झाको घरमा गएराति पसेको नकाबधारी डाँका समूहले लुटपाट गरेको हो ।

उनको घरमा राखिएको कोठाको दराज र बाकस फुटाएर नगद र सुनचाँदी गरी २० लाख रुपैयाँभन्दा बढीको सामान लुटेर लगेको रौतहटका डीएसपी नारायणप्रसाद चिमरियाले जानकारी दिए ।

सोमबार राति २ बजेको समयमा हतियारसहित घरमा आएको नकाबधारी समूहले बालकलाई बन्दुक तेर्साएर घरका परिवारजनलाई नियन्त्रणमा लिएर लुटपाट गरेको झाले बताए ।

घण्टौंसम्म घरमा रहेर लुटपाट गरेर डाँका समूह जाँदा पनि प्रहरीले सक्रियता नदेखाएको स्थानीयको आरोप छ । घटनापछि डीएसपी चिमरिया घटनास्थल पुगेका थिए । घटनाको बारेमा अनुसन्धान भइरहेको प्रहरीले जनाएको छ ।