महोत्तरीबाट ठूलो परिणाममा लागूऔषधसहित २ जना प्रहरी नियन्त्रणमा

टुडेपाटी-
महोत्तरी, भदौ २१ गते ।

सशस्त्र प्रहरीले महोत्तरीबाट लागूऔषधसहित २ जनालाई पक्राउ गरेको छ । आइतबार साँझ सम्सी गाउँपालिका–७ चाँदनी चोकबाट उनीहरुलाई पक्राउ गरेको हो ।

पक्राउ पर्नेमा गोर्खाको बुढीगण्डकी गाउँपालिका–२ का २३ वर्षीय अजय परियार र नुवाकोटको विदुर नगरपालिका–७ का ३० वर्षीय संजय भट्ट रहेका छन् ।

चाँदनी चोकमा प्रदेश नं. ०२–०२२ प ३४७२ नम्बरको मोटरसाइकलमा सवार उनीहरुलाई चेक गर्दा कालो झोलामा अगरबत्तीभित्र लागूऔषध लुकाएर ल्याउँदै गरेको अवस्थामा फेला पारेको सशस्त्र प्रहरी बल नेपाल नम्बर ९ गणका गणपति सशस्त्र प्रहरी उपरीक्षक सुरेश सापकोटाले जानकारी दिए ।

पक्राउ परेका उनीहरुको साथबाट नाइट्राभेट ट्यावलेट २३७० थान, प्रामेफाजिन हाइड्रोक्लोराइड इन्जेक्सन १२१ थान, ओफिन इन्जेक्सन ११८ थान, डाइजेल्याव इन्जेक्सन १७१ थान, डाइजेपाम इन्जेक्सन ४६ थान बरामद गरेको सापकोटाले बताए ।

पक्राउ परेका दुवैजनालाई आवश्यक कारवाहीका लागि जिल्ला प्रहरी कार्यालय महोत्तरीमा जिम्मा लगाइएको छ ।