किसानलाई बाँड्न दिएको मल एक वर्षदेखि बटेश्वर गाउँपालिकाको गोदाममा

टुडेपाटी-
जनकपुरधाम, असार १८ गते

खेतीपातीको बेला जहिल्यै मलखादको हाहाकारले किसान चिन्तत हुन्छन् । अहिले पनि धान रोपाइँ गर्न मलको अभावमा किसान छट्पटीरहेका छन् । तर सरकारले अनुदानमा किसानलाई वितरण गर्न दिएको रसायनिक मल धनुषाको बटेश्वर गाउँपालिकाले एक वर्षदेखि गोदामै थन्क्याएर राखेको छ ।

असार २०७७ मा कृषकलाई वितरणको लागि संघीय सरकारले ७० बोरा मल उपलब्ध गराएको थियो । सो मल बटेश्वर बजार स्थित साझा सहकारी संस्थाको गोदाममा वितरणको लागि राखेको थियो । तर ५० बोरा मल अझै गोदाममै थन्किएको छ ।

मल थोरै मात्रामा प्राप्त हुँदा वडाध्यक्षहरुले वितरणको लागि लिन अस्वीकार गरेकाले मल गोदाममै थन्किएको बटेश्वर गाउँपालिकाका निमित्त प्रशासकीय अधिकृत रुद्रनारायण यादवले बताए ।

गाउँपालिका कार्यालयले एकसाता अघि वडा नम्बर ५ लाई वितरणको लागि ७ वटा बोरा उपलब्ध गराएको जनाएको छ ।

अन्य १३ बोरा मल गाउँपालिका अध्यक्ष डम्बरबहादुर राउतले अाफ्ना अासेपासे कृषकलाई वितरण गरेको स्रोतले बताएको छ ।

उनी अख्तियारको स्ट्रिङ अपरेशनमा गएको फागुन १७ गते ८ लाख रुपैयाँ घुस फालेर फरार भएपछि तीनमहिना पश्चात् जेठ अन्तिम साता अख्तियारबाट धरौटी राखेर जमानतमा फर्केका छन् ।

वडाध्यक्षहरुले वडापिच्छे ७ बोरा मल मात्र उपलब्ध गराउने गाउँपालिका अध्यक्ष रायतले भनेपछि वितरण गर्न नसकिने भनेर अस्वीकार गरेको बताएका छन् ।