वीरगञ्जबाट अवैध करिब १७ लाखको सीपीयू र हार्डडिस्क बरामद

टुडेपाटी-
पर्सा, असार १४ गते ।

भारतबाट भन्सार छलेर ल्याइएको करिब १७ लाख बराबरको कम्प्युटर पार्ट्स वीरगञ्जबाट बरामद भएको छ ।

प्रहरीले भन्सार छली ल्याइएका उक्त सामानहरु वीरगञ्ज महानगरपालिका–१६ नग्वाबाट बरामद गरेको हो ।

५/७ जना तस्करहरुले भातरबाट भन्सार छली कम्प्युटर पार्ट्सहरु ल्याइरहेको भन्ने सूचनाको आधारमा खटिएको प्रहरी टोलीले डेल कम्पनीको आइ फाइभ सिपीयु ४९ पिस र हार्डडिस्क ७८ पिस बरामद गरेको पर्साका प्रहरी नायव उपरीक्षक ओमप्रकाश खनालले जानकारी दिए ।

बरामद गरिएको पार्टसहरुको बजार मूल्य १७ लाख रुपैयाँ रहेको उनले बताए ।

प्रहरीलाई देख्नासाथ तस्करहरु भने सामान छाडेर फरार भएको थियोे ।

बरामद गरिएको कम्प्युटर पार्ट्सहरुलाई आवश्यक कारवाहीको लागि वीरगञ्ज भन्सार कार्यालयमा बुझाइएको प्रहरीले जनाएको छ ।