सप्तरीमा आगलागीबाट ५ लाखको क्षति

शुभ नारायण यादव-
सप्तरी, माघ २८ गते ।

सप्तरीको राजगढ गाउँपालिका ५ स्थित धौनकी टोलमा आगलागी हुँदा चारवटा घर जलेर नष्ट भएको छ । बुधबार बिहान स्थानीय सहदेव मण्डलको गाइको गोठमा बालिएको घुरबाट अचानक सल्किएको आगोबाट करिब ५ लाखको क्षति भएको हो ।

आगोबाट मण्डलको गाइ गोठका साथै छिमेकीहरु शिवकुमार मण्डल, सुवंश मण्डल र कपलेश्वर मण्डलको एक एक ओटा घर जलेर नष्ट भएको प्रहरीले जनाएको छ ।

अचानक भएको आगलागीमा परी सहदेवको भैंसी जलेर मरेको जिल्ला प्रहरी कार्यालय सप्तरीले जनाएको छ । शिवकुमारको करिब २५ मन धान समेत जलेर खरानी भएको स्थानीयवासीले बताएका छन् ।

राजविराज नगरपालिकाबाट गएको बारुणयन्त्र प्रहरी र स्थानीयवासिन्दाको सहयोगमा आगो नियन्त्रणमा लिईएको थियो । आगलागीमा परी करिब पाँच लाख रुपैयाँ बराबरको क्षति भएको प्रहरीले प्रारम्भिक अनुमान गरेको जनाएको छ ।