सप्तरीमा मोटरसाइकल दुर्घटनामा परी एकजनाको मृत्यु, २ घाइते

शुभ नारायण यादव-
सप्तरी, माघ १५ गते ।

सप्तरीमा मोटरसाइकल दुर्घटना हुँदा एकजनाको मृत्यु भएको छ । कोसी ब्यारेजको नहर नजिक बिहीबार स.३प ३०४७ नम्बरको तीनजना सवार मोटरसाइकल दुर्घटना हुँदा मोटरसाइकल चालकको मृत्यु भएको हो ।

मोटरसाइकल आफै अनियन्त्रित भई दुर्घटना भएको प्रहरीले जनाएको छ ।

मृत्यु हुनेमा मोटरसाइकल चालक सप्तरीको तिलाठी कोइलाडी गाउँपालिका-३ सकरपुराका ३० वर्षीय शिवकुमार मुखिया रहेका छन् ।

दुर्घटनामा घाइते भएका मुखियाको विराटनगरस्थित गोल्डेन अस्पतालमा उपचारको क्रममा मृत्यु भएको जिल्ला प्रहरी कार्यालय सप्तरीका डिएसपी तथा प्रबक्ता भुवनेश्वर साहले जानकारी दिए ।

उनका अनुसार मोटरसाइकलमा पछाडि सबार सोही ठाउँका २० वर्षीय रामकुमार मुखिया र २५ वर्षीय रामअवतार खङ घाइते भएका छन् ।

मृतकको शव पोस्टमार्टमको लागि कोसी अस्पतालमा राखिएको तथा घटनाको सम्बन्धमा थप अनुसन्धान कार्य भइरहेको सप्तरी प्रहरीले जनाएको छ ।