लहानमा सडक कालोपत्र भएपछि स्थानीय खुसी

टुडेपाटी-
सिरहा, पुस ७ गते ।

सिरहाको लहान नगरपालिकाले पालिकाभित्रका सडक कालोपत्र र ढलान गर्न थालेपछि स्थानीय हर्षित भएका छन् ।

वर्षौंदेखि सडक जीर्ण हुँदा हिलो र धुलोका कारण समस्या भोग्दै आएका स्थानीय सडक पक्की भएसँगै हर्षित भएका हुन् ।

नगरपालिका–१३ र १४ लाई जोड्ने सडकलाई केही दिनअघि नगरपालिकाले कालोपत्रे गरिदिएपछि स्थानीयलाई लहान बजारसम्म पुग्न सहज मात्रै होइन, अब हिलो र धुलोबाट मुक्त भएको अनुभूति समेत भइरहेको छ ।

‘गाउँबाट लहान बजार पुग्न पहिला साइकलमा १ घण्टा जति समय लाग्थ्यो,’ लहान–१३ बस्तीपुरका रामअयोधी यादवले भने, ‘सडक कालोपत्र भएपछि लहान बजारसम्म पुग्न अहिले मुस्किलले १५ मिनेट लाग्छ ।’

अब धुलो र हिलोबाट समेत मुक्ति पाएको आभास भइरहेको उनको कथन छ । लहान–१३ बाट लहान बजारसम्मको करीब ८ किलोमिटरको कच्ची सडकलाई चालू आर्थिक वर्षमै कालोपत्र गरिएको नगरपालिकाको योजना शाखाले जनाएको छ ।

नगरपालिकाले ग्रामीण भेग र शहरको दूरीलाई कम गर्दै आवतजावतमा सहजता ल्याउने उद्देश्यले सडक कालोपत्र गरेपछि गाउँमा किसानले उत्पादन गरेको सामान बजारसम्म पुर्‍याउन सहज भएको स्थानीय कपिलदेव यादवले बताए । ‘पहिला–पहिला सडक जीर्ण हुँदा सवारी साधन त्यति चल्दैनथ्यो, जसका कारण गाउँमा उत्पादन भएको काउली, भाण्टा, मुला लगायतका तरकारी बाली सहजरूपमा बजारसम्म पुर्याउन समस्या हुन्थ्यो,’ स्थानीय गोदावरी कृषक समूहका अध्यक्षसमेत रहेका यादवले भने, ‘तर अहिले सो सडकमा थुप्रै संख्यामा अटोरिक्साहरू चल्न थालेको छ, जसले गर्दा सहजरूपमै ती बाली बजार पुर्‍याउन सकिरहेका छौं ।’ यसबाट किसानसमेत उत्साहित भएका उनको भनाइ छ ।

नेपालकै सबैभन्दा बढी वडा भएको सो नगरपालिकाले २४ वटै वडाका सडकलाई धुलो र हिलोमुक्त बनाउने लक्ष्य लिएको नगर प्रमुख मुनी साहले बताए । उनले कालोपत्र सडक निर्माणलाई शहरी र ग्रामीण क्षेत्रमा सन्तुलितरूपमा अघि बढाएको भन्दै यसमा सबैको साथ पाइरहेको उल्लेख गरे ।

नगर प्रमुख साहका अनुसार नगरपालिका क्षेत्रभित्रका करीब १४ किलोमिटर सडक कालोपत्र भइसकेको र बाँकी सडकमा समेत कार्य जारी छ । रासस