प्रदेश २ : बालकलाई टयाक्टरले ठक्कर दिएर मारे, शव परालको थुप्रोमा लुकाएर चालक फरार

टुडेपाटी–

सप्तरी, पुस ३ गते ।

सप्तरीमा एक बालकलाई टयाक्टरले ठक्कर दिएर चालकले शव परालको थुप्रोमा लुकाएको घटना सार्वजनिक भएको छ ।

बिहीबार दिउँसोदेखि बेपत्ता भएका सप्तरीको तिलाठी कोइलाडी गाउँपालिका–३ सकरपुराका ६ बर्षीय बालक आनन्द मुखियाको शव परालको थुप्रोमा फेला परेको प्रहरीले जनाएको छ ।

उनको खोजी गर्ने क्रममा शुक्रबार शव फेला पारिएको सप्तरीका प्रहरी प्रवक्ता भुवनेश्वर साहले बताए ।

‘उनलाई स १ त ७७५२ नम्बरको गाउँकै ट्याक्टरले ठक्कर दिएर मारेको रहेछ’ प्रवक्ता साहले भने, ‘बालकको मृत्यु भएपछि चालकले शव परालको थुप्रोमा गएर लुकाएका रहेछन् ।’

बालकलाई ठक्कर दिने ट्याक्टरका चालक फरार भएको र उनको खोजी भइरहेको प्रहरी प्रवक्ता साहले बताए ।

बालकको शवलाई पोष्टमार्टमका लागि गजेन्द्रनारायण सिंह अस्पताल ल्याइएको र घटनाका सम्बन्धमा अनुसन्धान भइरहेको उनले जनाए ।

बिहीबार बेलुका घरबाहिर खेल्न निस्केका स्थानीय रोहित मुखियाका छोरा आनन्द वेपत्ता भएका थिए ।