पुर्वराज्यमन्त्री यादव जुवा खालबाट पक्राउ

टुडेपाटी

काठमाडौँ, कार्तिक १६ गते ।

पूर्वराज्यमन्त्री खोभारी राय यादवसहित १० जना जुवाखालबाट पक्राउ परेका छन् । महानगरीय प्रहरी वृत्त स्वयम्भुले उनीहरुलाई शनिबार पक्राउ गरेको हो ।

पक्राउ पर्नेमा विक्रम लामा, देवेन्द्र श्रेष्ठ, उत्तर कुमार लामा, जीतपुर लामा, पर्वत भण्डारी, कान्छा तामाङ र सबिन लामालगायत छन् ।

स्वयम्भुस्थित साँइली तामाङको घरमा जुवा खेलिरहेको अवस्थामा पक्राउ परेका उनीहरुको साथबाट १ लाख ५३ हजार नगद समेत प्रहरीले बरामद गरेको छ ।

राय २०५२ सालमा शेरबहादुर देउवा, २०५३ सालमा लोकेन्द्रबहादुर चन्द र २०६८ सालमा डा. बाबुराम भट्टराई प्रधानमन्त्री हुँदा राज्यमन्त्री भएका थिए ।

यसअघि, मन्त्री नियुक्त भएपछि घरको छतबाट बन्दुक पड्काउँदा यादव विवादमा आएका थिए ।

२०७४ सालमा तत्कालीन नेकपा माओवादी केन्द्रमा प्रवेश गरेयता उनी राजनीतिमा सक्रिय छैनन् ।