प्रदेश २ : लागुऔषध सहित नितेश र सियाराम प्रहरीको फन्दामा

शुभ नारायण यादव

सप्तरी , कार्तिक १५ गते ।

सप्तरीबाट लागुऔषध सहित दुई जना पक्राउ परेका छन् । पक्राउ पर्नेमा सप्तरीको बोदेबसाइन नगरपालिका– ३ कुशमहारका ३१ वर्षीय नितेशकुमार मण्डल र सोही ठाउँका ३२ वर्षीय सियाराम मण्डल रहेका छन् ।

स ११ प ८२५ नम्वरको मोटरसाईकल चेकजाँच गर्ने क्रममा मोटरसाइकलको पछाडी सवार सियारामले बोकेको झोलाबाट लागुऔषध बरामद गरिएको ईलाका प्रहरी कार्यालय कडरबोनाले जनाएको छ ।

ईलाका प्रहरी कार्यालय बोदे बरसाईनका टोलीले जिल्लाको बोदे बसाइन नगरपालिका – १० स्थित बोदे बरसाईन–विसनपुर सडक खण्डमा चेकजाँचको क्रममा लागुऔषधसहित दुई जनालाई पक्राउ गरेको हो ।

प्रहरीका अनुसार झोलाबाट ८९४ थान नाईट्राभेट–१० ट्याब्लेट बरामद भएको हो । मोटरसाईकलसहित नियन्त्रणमा लिइएको उनीहरुमाथि थप अनुसन्धान भईरहेको प्रहरीले जनाएको छ । यसअघि पनि बोदे बरसाईन नगरपालिका–१० खडकपुरका औषधी ३७ वर्षीय रंजितकुमार यादवलाई लागुऔषधसहित पक्राउ गरिएको थियो ।