महोत्तरीमा बलात्कार प्रयासको मुद्दा फिर्ता लिन १० लाख रुपैयाँ, १० कठ्ठा जग्गाको प्रलोभन !

टुडेपाटी

जनकपुरधाम, असोज २० गते ।

महोत्तरीको भंगहा नगरपालिकामा वडासचिवबाट बलात्कृत भएकी महिलालाई मुद्दा फिर्ता लिन विभिन्न प्रलोभन आउन थालेको छ । वडा सचिवविरुद्ध जिल्ला प्रहरी कार्यालय महोत्तरमा जबरजस्ती करणी उद्योगमा मुद्दा दर्ता भएपछि पीडितका आफन्तसँगै गाउँका अगुवाहरुबाट प्रलोभन आउन थालेको पीडितले बताएकी छन् ।

भंगहा नगरपालिका ९ का वडा सचिव मिथिलेश यादवले बुधवार ती महिलालाई बलात्कारको प्रयास गरेका थिए । हरिनमरी बजारबाट साँझ ढकिया बेचेर फर्किँदै गर्दा बाटोमै रोकेर पोखरी नजिक लगि लछारपछार गर्दै जबरजस्ती करणीको प्रयास गरेको महिलाको आरोप छ ।

‘पैसा लिएर मिलापत्र गर्न धेरै किसिमको मलाई धम्की आइरहेको छ, पहिले दुई लाख दिन्छु भन्थे, नमानेपछि दस लाख दिन्छु भन्छ, अब १० कठ्ठा जग्गा तेरो नाममा गरिदिन्छु तर मुद्दा फिर्ता लिहाल, हैन भने मारिदिन्छु भनेर धम्की दिन्छन्, पीडित महिलाले भनिन, ुस्थानीय जनप्रतिनिधि नै मलाई पटक–पटक पैसाको लोभ देखाउँदै मुद्दा फिर्ता नलिए ज्यान मार्ने सम्मको धम्की दिन्छ, तर मैले मानेको छैन, मैले मेरो खोसिएको अस्मिता र इज्जत त फर्किदैन, तर मैले गुमाएको अस्मिता त्यसै खेर जान दिन्न, मलाई न्याय चाहिन्छ।

यादव छुटेर आए परिवारै सिध्याउने धम्की आउने गरेको पीडित महिलाको भनाइ छ । चारैतिरबाट धम्की आउँछ, मुद्दा फिर्ता लि नत्र तेरो घरमा कसैलाई छोडदिन भन्छन, पीडित महिलाले भनिन, ुबिहान बेलुका मेरो माइतमा समेत छोरीलाई सम्झाई हाल नभए ठीक हुँदैन भनेर धम्क्याउँछन, अब त एक्लै घरमा बस्न समेत डर लाग्छ, जो कोही पनि घरमा आएर पनि आएर धम्काएर जान्छ, मुद्दा फिर्ता लिहाल हैन, भने ठीक हुँदैन ।ु

सुस्केरा हाल्दै पीडित महिलाले भनिन, मेरो त बाहिर निस्कनै बन्द भएको छ, घरमा पढेलेखेको कोही छैनन, कसैले केही बुझ्दैनन, जसले जे भन्यो त्यहीमा मुन्टो हल्लाउँछ, म एक्लै न्यायको लागि कहाँ भौतारिनु ? पीडित महिलाले भनिन्, ुघरदेखि लिएर बजारसम्म मान्छेले मलाई विभिन्न प्रलोभन दिन्छन्, बजारमा म ढाकी, सुपली, कन्तरी बेचेर गुजाराका लागि जान्छु, तर त्यहाँ अर्कै बखेडा झिकिन्छ, मिल्न दबाब दिइन्छ, म कहाँ जाउँ कस्ले मलाई न्याय दिन्छ ।ु

२०७७ असोज १५ गते जबरजस्ती करणी मुद्दा दर्ता गरी थप अनुसन्धान भइरहेको जिल्ला प्रहरी कार्यालय महोत्तरीका प्रहरी उपरीक्षक टिकाबहादुर केसीले जानकारी दिए । उनले भने, अभियुक्तलाई हिरासतमा राखी अनुसन्धानमा लागिरहेका छौं।