बिचल्लीमा धनुषाका किसान : वर्षेणी ६ हजार टन मल चाहिने तर आपुर्ति ७ सय टन मात्रै

टुडेपाटी

जनकपुरधाम, भदौ १८ गते ।

अन्नणको भण्डार मानिने प्रदेश २ का करिब ८० प्रतिशतभन्दा बढी जनता कृषिमै निर्भर छन्। तर मल नपाएर यहाँका किसान मात्र मार्कामा परेका छैनन् चर्को मूल्यमा भारत लगायतका देशबाट धाम चामल लगायतका खाद्यवस्तु किन्नु परेको छ ।

मल अभावले कतिपय किसान पछिल्लो समय खेती नै गर्न छाडेका छन् भने कतिपय कालोबजारीको मल किन्न बाध्य छन् ।

कृषि सामग्री कम्पनी लिमिटेडको कार्यालय र साल्ट ट्रेडिङको कार्यालय धनुषामा दिनहुँ मल लिनेहरुको भिडभाड हुने गर्छन् । तर त्यहाँबाट मल नपउँदा निरास भएर उनीहरुले फर्किनु परेको छ ।
मल आपूर्ति कृषि सामग्री कम्पनी लिमिटेड र साल्ट ट्रेडिङ कर्पोरेसन लिमिटेडले गर्दै आएका छन्। यीमध्ये ७० प्रतिशत जिम्मा कृषि सामग्री कम्पनीको छ भने ३० प्रतिशत साल्ट ट्रेडिङको। तोकिएका निकायले समयमा उपलब्ध नगराउँदा किसानहरू कालोबजारीको मारमा छन्।

अरू बेला ९ सयदेखि हजार रूपैयाँ पर्ने एक बोरा युरिया किन्न १६ सय खर्चिनुपरेको किसान सुरेशले बताए। त्यस्तै, डिएपी मल बोराको दुई हजार पाँच सय रुपैयाँ पर्छ।

कृषि सामग्री कम्पनी लिमिटेड धनुषाले डिएपी र युरिया गरी धनुषामा प्रत्येक वर्ष ६ हजार टन मल आवश्यक रहेको बताएको छ।

हरेक सिजनमा कम्तीमा तीन हजार टन डिएपी र तीन हजार टन युरियाको माग रहे पनि कार्यालयले अहिलेसम्म ६९९ टन युरिया र ३ टन डिएपी मात्र आपूर्ति गरेको केसरीले जानकारी दिए।