कोरोना संक्रमणबाट मृत्यु भएका महोत्तरीका वृद्धको शव अस्पतालबाट चार दिनपछि उठ्यो

टुडेपाटी

महोत्तरी, भदौ १३ गते ।

कोरोना संक्रमणका कारण ज्यान गुमाएका महोत्तरीका वृद्धको शव जिल्ला प्रशासन कार्यालय मोरमोरङले चार दिनपछि उठाएको छ ।

न्यूरो अस्पताल विराटनगरमा मंगलबार राति मृत्यु भएका महोत्तरीका पुरुषको शव शनिबार दिउँसो स्थानीय प्रशासनले उठाएको हो ।

आफन्त र परिवारका सदस्य सम्पर्कमा नआउनुका साथै महोत्तरी प्रशासनले चासो नदिँदा मंगलबार राति ११ बजेतिर मृत्यु भएका ६१ वर्षीय पुरुषको शव अस्पतालमा नै अलपत्र परेको थियो ।

अस्पतालका निर्देशक रञ्जीतराज बस्नेतका अनुसार बिरामी भर्ना गर्दा कुरुवाका रुपमा छोरा अस्पताल आएका थिए । तर संक्रमितको मृत्युपछि छोरा पनि सम्पर्कविहीन बनेका थिए ।

मोरङ प्रशासनले समन्वय गरेर शनिबार शव महोत्तरी पठाइएको छ । मोरङका प्रमुख जिल्ला अधिकारी कोषहरि निरौलाले महोत्तरीबाट लिनलाई कोही पनि नआएपछि विराटनगरबाटै एम्बुलेन्स खोजेर शव महोत्तरी पठाउने व्यवस्था मिलाएका हुन् । महोत्तरीमा प्रशासनले शवको अन्त्यष्टि गर्नेछ ।

वृद्धको उपचारका क्रममा लागेको अस्पतालको दुई लाख २५ हजार र फार्मेसीको ७० हजार रुपैयाँ छुट गरिएको जानकारी दिए ।

टाउकाको नसा सुकेर प्यारालाइसिस भएका उनलाई साउन ३१ गते अस्पतालमा भर्ना गरिएको थियो । कोरोनाको आंशकामा भदौ ३ गते स्वाब संकलन गरेर परीक्षण गराउँदा ७ गते रिपोर्ट पोजेटिभ आएको थियो ।