श्रोत नखुलेको साढे २८ लाख रुपैयाँसहित रौतहटबाट एक युवक पक्राउ

टुडेपाटी-
रौतहट, भदौ ११ गते ।

रौतहटमा श्रोत नखुलेको २८ लाख ५१ हजार ९ सय ६० रुपैयाँसहित शसस्त्र प्रहरीले एकजनालाई पक्राउ गरेको छ ।

विषेश सूचनाको आधारमा शसस्त्र प्रहरी उपरीक्षक सूर्यबहादुर सेन ओलीको कमाण्डमा गएको प्रहरी टोलीले श्रोत नखुलेको रकम बरामद गरेको हो ।

बुधबार बिहान करिब ७ बजे रौतहटको ईशनाथ नगरपालिका ९ लवतनाटोलबाट उक्त रकमसहित राजपुर नगरपालिका–९ बैरिया बस्ने २० वर्षीय दिलीपकुमार साह पक्राउ परेका हुन् ।

सीमा क्षेत्र भारतबाट बीआर ३० एन ९५८० नम्बरको मोटरसाइकलमा नेपालतर्फ आउँदै गरेका उनलाई चेकजाँच गर्दा रकम फेला परेको सशस्त्र प्रहरी बल नेपाल नं. ११ गण हेड क्वार्टर रौतहटका सशस्त्र प्रहरी उपरीक्षक सूर्यबहादुर सेन ओलीले बताए ।

उनीबाट नगद, मोटरसाइकल र मोबाइलसहित नियन्त्रणमा लिएको र आवश्यक कारबाहीको लागि गौर भन्सार कार्यालयमा बुझाउने प्रक्रियामा रहेको शसस्त्र प्रहरी उपरिक्षक ओलीको भनाइ छ । घटनाबारे थप अनुसन्धान भइरहेको छ ।