सिरहामा आफ्नै घरमा ब्राउनसुगर बिक्री गर्ने ६ जना पक्राउ

नितेश यादव-
जनकपुरधाम, साउन २५ गते ।

सिरहामा आफ्नै घर कोठाबाट अवैध लागुऔषध ब्राउन सुगरसहित ६ जनालाई प्रहरीले पक्राउ गरेको छ ।

सिरहाको गोलबजार नगरपालिका वडा नं. ६ दोहटियाका २८ वर्षीय पाण्डव गुप्ताले आफ्नै घर कोठामा बिक्रीवितरणको लागि लुकाई छिपाई राखेको लागुऔषधसहित पक्राउ गरेको जिल्ला प्रहरी कार्यालय सिरहाले जनाएको छ ।

पक्राउ पर्नेमा सिरहाको गोलबजार नगरपालिका-६ बस्ने घर मुली २८ वर्षीय पाण्डव गुप्ता, २२ वर्षीय सुरज परियार, २० वर्षीय रोशन लामा, वडा नं. ४ बस्ने वर्ष २० कै सैफली खान रहेका छन् ।

त्यस्तै, गोलबजार नगरपालिका वडा नं. ५ बस्ने १९ वर्षीय विवेक श्रेष्ठ, वडा नम्बर ६ बस्ने १९ वर्षीय शिरिल महरालाई पक्राउ गरेको जिल्ला प्रहरी कार्यालय सिरहाका प्रहरी नायव उपरीक्षक विनोद घिमिरेले जानकारी दिए ।

आइतबार विशेष सुचनाको आधारमा ईलाका प्रहरी कार्यालय गोलबजार सिरहाबाट खटेको प्रहरी टोलीले उनीहरूलाई पक्राउ गरेको डीएसपी घिमिरेले बताए ।

पक्राउ परेका पाण्डव सहित उनीहरूको साथबाट लागुऔषध ब्राउनसुगर जस्तो देखिने सेतो प्लाष्टिकको स-साना पोका ५ थान, कालो प्लाष्टिको ठूलो पोका १ थान, (पलाष्टिक सहित तौल गर्दा १ ग्राम ४०० मिलीग्राम, पलाष्टिक बाहेक तौल गर्दा १ ग्राम २०० मिलीग्राम) लागुऔषध बरामद भएको डीएसपी घिमिरेले बताए ।

लागुऔषध ओसारपसार, सेवन गर्ने पाण्डव गुप्ता समेतलाई नियन्त्रणमा लिएर थप अनुसन्धान भइरहेको प्रहरीले जनाएको छ ।