महोत्तरीको औरही नगरपालिकामा अनिश्चितकालीन लकडाउन

टुडेपाटी-
जनकपुरधाम, साउन २५ गते ।

कोरोना भाइरसको संक्रमण तीब्र रुपमा फैलिरहेकोले गर्दा महोत्तरीको औरही नगरपालिकामा अनिश्चितकालका लागि लकडाउन घोषणा गरिएको छ । आइतबार राति १२ बजेदेखि लागू हुने गरि नगरपालिकाले अर्को सूचना जारी नगरेसम्मका लागि लकडाउन घोषण गरिएको हो ।

नगरपालिकाका कर्मचारी लगायत समुदायस्तरमा कोरोना संक्रमण फैलिएकोले लकडाउन घोषणा गरिएको नगरपालिकाले जनाएको छ ।

नगरपालिका भित्रका अत्यावश्यक स्वास्थ्य सेवा बाहेकका सबै व्यवसाय तथा नगरपालिका मातहतका कार्यालयहरु, बैंक तथा वित्तीय संस्था लगायत सबै हाटबजार पूर्ण रुपमा बन्द गर्ने निर्णय गरिएको व्यहोरा नगरपालिकाले जारी गरेको विज्ञप्तिमा उल्लेख छ ।

अति आवश्यक काम बाहेक नगरभित्र आवतजावत गर्न पूर्ण रुपमा बन्देज लगाइएको, अनुमति प्राप्त सवारीसाधन बाहेक सबै प्रकारका सार्वजनिक तथा निजी यात्रुबाहक सवारी चलाउन नपाइने गरि लकडाउन गरिएको नगरपालिकाले जनाएको छ ।

त्यसैगरी लकडाउन उल्लंघन गर्ने जोकोहीलाई कानून बमोजिम कारबाही गर्ने समेत नगरपालिकाले चेतावनी दिएका छन् ।