प्रदेश २ : कोरोना जितेर एकैदिन ९ जना घर फर्के, यी हुन निको भएर घर फर्किनेहरु

टुडेपाटी-
जनकपुरधाम, जेठ १० गते ।

प्रदेश २ मा आइशोलेसनमा उपचार गराइरहेका ९ जना कोरोना संक्रमित एकैदिन निको भएर घर फर्केका छन् ।

वीरगन्जको नारायणी अस्पतालको आइसोलेसनमा उपचाररत ९६ मध्ये ९ जना निको भएर घर फर्केका हुन् ।

वीरगन्जका तीन, बाराका दुई, रौतहटका तीन र एक भारतीय नागरिक डिस्चार्ज भएको नारायणी अस्पतालका मेडिकल सुपरिडेन्टेन्ट डा. मदन उपाध्यायले जानकारी दिए ।

उनका अनुसार लगातार दोश्रो रिपोर्ट नेगेटिभ आएपछि उनीहरुलाई डिस्चार्ज गरिएको हो । दुई पटकको रिपोर्ट नेगेटिभ आएपछि शनिबार साँझ ८ जना नेपाली ८ र एक भातीय नागरिक घर फर्केको उनले बताए ।

अस्पतालबाट घर गएपछि कम्तीमा पनि एक हप्तासम्म सेल्फ आइसोलेसनमा बस्ने गरी उनीहरुलाई डिस्चार्ज गरिएको हो।

मेसु उपाध्यायका अनुसार शनिबार डिस्चार्ज भएका ९ मध्ये ८ नेपालीलाई एम्बुलेन्समा राखेरघर पठाइएको छ। भारतीय नागरिकलाई भने नेपाल भारत सीमा नाका बन्द रहेकाले वीरगन्ज–३ छपकैयाको एक घरमा राखिएको छ।

अब वीरगन्जको आइसोलेसनमा अब ८७ कोरोना संक्रमित उपचाररत रहेको मेसु उपाध्यायले जानकारी दिए।

डिस्चार्ज हुनेमा पर्सा जिल्लाको वीरगन्ज महानगरपालिका–३ घर भइ वीरगन्ज महानगरपालिकाको सरफाइकर्मी ५० वर्षीय, वडा नम्बर १६ घुसुकपुरका ५१ वर्षीय र वडा नम्बर २ का ५० वर्षीय पुरुष छन्।

यस्तै वडा नम्बर–३ र वडा नम्बर–१६ का दुईजनालाई वैशाख १४ र वडा नम्बर–२ का एक जनालाई वैशाख १७ गते कोरोना संक्रमण पुष्टि भएपछि अस्पताल भर्ना गरिएको थियो।

शनिबार डिस्चार्ज हुनेमा बाराका दुईजना मध्ये जितपुर सिमरा उपमहानगरपालिका–७ का ४३ वर्षीय र बाराकै सिम्रौनगढ नगरपालिका ४ का ३१ वर्षीय पुरुष हुन्।
यी दुवैलाई जेठ १७ मा संक्रमण पुष्टि भएको थियो।

रौतहटको गुजरा नगरपालिका–५ का ३५ वर्षीय र बिन्दाबन नगरपालिका ९ का २४ वर्षीय पुरुषलाई पनि शनिबार डिस्चार्ज गरिएको मेसु उपाध्यायले जानकारी दिए। उनीहरुलाई वैशाख १६ गते संक्रमण पुष्टि भएपछि अस्पताल ल्याइएको थियो।

यसैगरी वैशाख १४ मा निको भइ अस्पतालबाट डिस्चार्ज गरेर पठाए पनि फेरि एक हप्तापछि संक्रमण देखिएर अस्पतालमा ल्याएर राखिएका दुई जनालाई पनि शनिबार डिस्चार्ज गरिएको छ ।

रौतहटको इशनाथ नगरपालिकाका १९ वर्षीय युवक र १ भारतीयलाई निको भएको भन्दै नारायणी अस्पतालले यसअघि पहिलो पटक वैशाख १४ गते डिस्चार्ज गरेको थियो।

अस्पतालबाट डिस्चार्ज भएको एक हप्ता बित्न नपाउदै ती दुवै जनाको पीसीआर रिपोर्ट पोजिटिभ आएपछि वैशाख २१ गते फेरि अस्पताल भर्ना गरिएको थियो।

वैशाख २१ गते अस्पतालमा ल्याएर राखेपछि लगातार दुई रिपोर्ट नेगेटिभ आएको र स्वास्थ्य अवस्था पनि सामान्य रहेका भन्दै उनीहरुलाई पुनः शनिबार डिस्चार्ज गरिएको हो।