बर्दिबासमा मिनिट्रकबाट ५४७ किलो गाँजा बरामद, चालक पक्राउ
टुडेपाटी-
जनकपुरधाम, चैत ३ गते ।
महोत्तरी प्रहरीले ठूलो परिमाणमा लागूऔषध गाँजा बरामद गरेको छ । सिन्धुलीबाट बर्दिबासतर्फ आउँदै गरेको बा.३ ख. ५८३२ नम्बरको मिनिट्रक जाँच गर्दा ५४७ किलो गाँजा फेला परेको हो।
बर्दिबास नगरपालिका–३ गौरीडाँडास्थित अस्थायी ट्राफिक प्रहरी पोस्टमा शंका लागी जाँच गर्दा, ट्रकको हुडमा फल्स बटम बनाई कालो त्रिपालले छोपेर लुकाइएको अवस्थामा ३५ पोका गाँजा भेटिएको महोत्तरी प्रहरीका प्रवक्ता डिएसपी सन्तुलाल जयसवारले जानकारी दिए ।
प्रहरीले मिनिट्रकसहित चालक सिन्धुपाल्चोक, बाह्रबिसे नगरपालिका–७ घर भई हाल काठमाडौं महानगरपालिका–६ टोखा ग्रिनल्याण्डमा बस्दै आएका ३७ वर्षीय सलिन मगरलाई पक्राउ गरेको छ।
पक्राउ परेका चालकविरुद्ध थप अनुसन्धान गरिरहेको जिल्ला प्रहरी कार्यालय महोत्तरीले जनाएको छ।
