मधेश प्रदेश : लागूऔषधसहित दुईजना पक्राउ

टुडेपाटी–
बारा, भदौ ३ गते ।

प्रतिबन्धीत लागूऔषधसहित बाराबाट दुईजना पक्राउ परेका छन् ।

पक्राउ पर्नेमा जिल्लाको निजगढ नगरपालिकाका–९ ठाडोलाईका २४ वर्षीय सुजल लामा र निजगढ नगरपालिका–७ योजनाका ३९ वर्षीय सन्तबहादुर लामा रहेका छन् ।

जिल्ला ट्राफिक प्रहरी कार्यालय बारा नजिकैबाट शुक्रबार उनीहरु पक्राउ परेका हुन् ।

ट्राफिक प्रहरी कार्यालय बाराले चेकजाँच गर्ने क्रममा दुईजनालाई लागुऔषधसहित पक्राउ गरेको हो ।

पूर्व‍–पश्चिम लोकमार्ग सडक खण्डबाट पथलैयाबाट निजगढ आउँदै गरेको प्रदेश–२–०३–०१३ प ९४४६ नम्बरको स्कुटर चेकजाँच गर्दा दुबैजनालाई पक्राउ गरिएको हो ।

उनीहरुको साथबाट डाइजेपाम, फेनारागन र नेफिन गरी जम्मा २६–२६ थान बरामद गरेको प्रहरीले जनाएका छन् ।

यस सम्बन्धमा थप अनुसन्धान भइरहेको बारा प्रहरीले जनाएका छन् ।