धनुषामा घाँटी थिचेर गौरीको हत्या, श्रीमान् र ससुरा पक्राउ

टुडेपाटी-
जनकपुरधाम, असार १० गते ।

श्रीमतीलाई घाँटी थिचेर हत्या गरेको आरोपमा प्रहरीले आफ्नै श्रीमान् र ससुरालाई पक्राउ गरेको छ ।

धनुषाको शहिदनगर नगरपालिका ८ नाथपट्टीकी बस्ने रामचन्द्र मण्डल खत्वेकी ३५ वर्षीया श्रीमती श्रीमती गौरी देवी मण्डलको घाँटी थिचेर हत्या भएको थियो ।

घटना पश्चात फारर श्रीमान र ससुरा ८ महिना पश्चात पक्राउ परेका हुन् ।

पक्राउ पर्नेमा श्रीमान रामचन्द्र मण्डल खत्वे र उनका बुवा अर्थात् मृतककी ससुरा सहदेव मण्डल खत्वे रहेका छन् ।

सिरहाको गोलबजार नगरपालिका–५ बस्ने मुनेश्वर मण्डलको श्रीमती तेतरी देवी मण्डल (मृतकको आमा) ले रामचन्द्रलाई विपक्षी बनाइ ज्यानसम्बन्धी कसुर (कर्तव्य ज्यान) मुद्दा शीर्षकमा ईलाका प्रहरी कार्यालय यदुकुहामा जाहेरी दरखास्त दिएकी थिइन् ।

प्रहरीले अनुसन्धान गर्दै जाँदा भारतको लदनिया थाना (पञ्चायत) तेनुवाही गाउँमा लुकीछिपी बसिरहेको भन्ने सूचना प्राप्त गरेको थियो ।

बुधबार उनीहरू भारततर्फबाट सिरहाको वरियारपट्टी गाउँपालिका–३ वरियारपट्टी चौकतर्फ हिँड्डुल गर्दै आइरहेको गोप्य सूचनाको आधारमा उनीहरूलाई पक्राउ गरिएको जिल्ला प्रहरी कार्यालय धनुषाका प्रवक्ता प्रहरी नायव उपरीक्षक प्रदीपबहादुर क्षेत्रीले जानकारी दिए ।

पक्राउ परेका उनीहरू दुवै जनालाई जिल्ला अदालत धनुषाबाट कर्तव्य ज्यान मुद्दा शीर्षकमा ५ दिनको म्याद थप गराई अनुसन्धान भइरहेको धनुषा प्रहरीले जनाएको छ ।