सप्तरीमा एक किशोरीमाथि सामूहिक बलात्कार : तीन बालक सुधार गृह र एक युवक जेल चलान

टुडेपाटी-
सप्तरी, जेठ २६ गते ।

सप्तरीमा किशोरीमाथि भएको सामूहिक बलात्कार घटनाका तीन आरोपित नाबालकलाई बालसुधार गृह पठाइएको छ ।

सप्तरी जिल्ला अदालतको आदेशमा उनीहरूलाई बिहीबार बालसुधार गृह वीरगञ्ज पठाएको हो ।

सप्तरी जिल्ला अदालतका न्यायाधीश राजेन्द्रकुमार श्रेष्ठको इजलाशले आरोपित शम्भुनाथ नगरपालिका–४ सखुवाका २० वर्षीय सुरेश भनिने सुरैतलाल रामलाई भने पुर्पक्षका लागि राजविराज कारागार चलान गरिएको छ ।

घटनाका मुख्य आरोपित २० वर्षीय दिपक सरदार भने फरार छन्।

गत जेठ २ गते पूर्व–पश्चिम राजमार्गको दक्षिण शम्भुनाथ नगरपालिका–३ स्थित प्रसिद्ध शम्भुनाथ मन्दिरमा लाग्ने मेला घुम्न गएकी १७ वर्षीया बालिकाको सामूहिक बलात्कार भएको थियो । उनीहरुले आफूलाई सामूहिक बलात्कार गरेको पीडितले बताएकी छन् ।

पीडितका अनुसार आरोपितहरूले शम्भुनाथ मन्दिरदेखि सय मिटर पूर्व–दक्षिणतर्फ पानी ट्यांकी छेउमा लगेर सामूहिक बलात्कार गरेका हुन् ।

घटनाबारे घरपरिवारमा जानकारी गराएपछि पीडितका हजुरबुवाले घटनाकै दिन जिल्ला प्रहरी कार्यालयमा उजुरी दिएका थिए।

उजुरीका आधारमा प्रहरीले तत्कालै सुरैतलाल र तीन नाबालकलाई पक्राउ गरेर अनुसन्धानसहित कारबाही प्रक्रिया अघि बढाएको थियो ।