माग पूरा नभए असारदेखि चरणवद्ध आन्दोलनमा उत्रिने मिटर रिडरहरुको चेतावनी

टुडेपाटी-
जनकपुरधाम, जेठ २४ गते ।

नेपाल विद्युत प्राधिकरण मिटर रिडर संघर्ष समितिले आन्दोलनको चेतावनी दिएको छ । प्राधिकरण कार्यालयबाट अपमानपूर्ण व्यवहार भएको भन्दै संघर्ष समितिकले आन्दोलनको चेतावनी दिएको हो ।

नेपाल विद्युत प्राधिकरणको प्रादेशिक कार्यालयलाई संघर्ष समितिका अध्यक्ष रामनाथ महतो र सचिव सुरेन्द्र अरगरियाले संयुक्त रुपमा ध्यानाकर्षण पत्र बुझाउँदै सात दिनभित्र माग पूरा नभए चरणबद्ध आन्दोलन गर्ने चेतावनी दिएका हुन् ।

लामो समयदेखि प्राधिकरणले मिटर रिडरमाथि विभेद गर्दै सेवासुविधाबाट वञ्चित गरेको संघर्षसमितिको आरोप छ ।

लामो समयदेखि कार्यरत रहेर विद्युत प्राधिकरणको हरेक कामकाजमा उत्साहपूर्ण र सक्रिय सहभागी भए पनि मिटर रिडरलाई बेवास्ता गर्दै आएको उनीहरुको भनाइ छ ।

पटकपटक आफ्ना मागबारे ध्यानाकर्षण गर्दा पनि सम्बन्धित निकायले समाधानका लागि चासो नदेखाएकाले सात दिनभित्र माग सम्बोधन गर्न उनीहरुले अल्टिमेटम दिएका छन् ।

ध्यानाकर्षण पत्रमा विगत १५ वर्षदेखि विद्युत प्राधिकरणमा कार्य गर्दै आए पनि प्राविधिकरुपमा पाउनुपर्ने सेवा सुविधाबाट वञ्चित गरेको उल्लेख छ । ‘हामी मिटर रिडरलाई विभेद गरी गोटे ठेक्काका मान्छे हुन् भनि दुस्प्रचार गरियो । हामीले यस प्राधिकरणमा गरेको योगदान र श्रमको खिल्ली उडाइयो, कुनै मूल्यांकन समेत भएन,’ ध्यानाकर्षणपत्रमा भनिएको छ ।

माग पूरा नभए आगामी असार १ गतेबाट चरणबद्धरुपमा आन्दोलनको कार्यक्रम अघि बढाउने संघर्ष समितिले चेतावनी दिएको छ ।