मिनापको होरी महोत्सव आज देखि सुरु, भोली महामुर्ख सम्मेलन हुने
टुडेपाटी–
जनकपुरधाम, चैत ३ गते ।
जनकपुरधाममा मिथिला नाट्यकला परिषद्को आयोजनामा बिहीबारदेखि होरी महोत्सव सुरु हुँदैछ। प्रत्येक वर्ष मिनापले प्रत्येक वर्ष परम्परागत संस्कृतिलाई बचाउन होरी महोत्सव गर्दै आएको छ।
मिनापको आयोजनामा बिहीबार हाँस्य कवि गोष्ठी र होरी महोत्सव तथा शुक्रबार महामूर्ख सम्मेलन हुने महासचिव शैलेन्द्र मल्लिकले जानकारी दिए।
Sponsored
होरी÷जोगिरा गायन प्रतियोगितामा विभिन्न १० टिम सहभागी हुने उनले बताए।
होरी गायन प्रतियोगितामा धनुषाको गिद्धा, बेलापटी, बेला, गेरुवाही, जमुनीवास, धनुषाधाम, महोत्तरीको पिपरा, विश्वम्भरपुर र सप्तरी जिल्लासहितको टिमले सहभागिता जनाउने छ।
जोगिरा गायन प्रतियोगितामा सहभागी हुने शीर्ष तीन टिमलाई सम्मानसहित पुरस्कार र अन्यलाई सान्त्वना शिल्ड प्रदान गरिने मिनापले जनाएको छ।
Sponsored
होरी महोत्सवको दोस्रो दिन महामूर्ख सम्मेलनको आयोजना गरिनेछ । हालसम्म मुख्यमन्त्रीदेखि साहित्यकारसम्मले यो उपाधि पाइसकेका छन्।
मिनापले यस पटकको महामूर्खका लागि करिब दुई दर्जन विशिष्ट व्यक्तिहरुको सूची तयार पारेको छ।
जनकपुरधाममा २०६१ सालबाट महामूर्ख सम्मेलन हुँदै आएको छ।
