मोटरसाइकल दुर्घटनामा सर्लाहीमा एकको मृत्यु

टुडेपाटी–
जनकपुरधाम, फागुन १५ गते ।

सर्लाहीमा मोटरसाइकल दुर्घटना हुँदा एकजनाको मृत्यु भएको छ ।

जिल्लाको बरहथवाबाट कौडेनातर्फ जाँदै गरेको प्र २–०३–०१९ प ३६०५ नम्बरको मोटरसाइकल आफैं अनियन्त्रित भई धनकौल गाउँपालिका–२ मधुवनी नयाँरोड सडकखण्डस्थित लँगडा पुलमा खस्दा चालकको मृत्यु भएको प्रहरीले जनाएको छ ।

दुर्घटनामा परेर मोटरसाइकल चालक कौडेना गाउँपालिका–३ का ३५ वर्षीय मनोज चौधरीको मृत्यु भएको जिल्ला प्रहरी कार्यालय सर्लाहीका प्रहरी निरीक्षक जटाशंकर यादवले जानकारी दिए ।

टाउको र शरीरमा गम्भीर चोट लागी घाइते भएका चौधरीलाई उपचारको लागि बरहथवा पठाइएकोमा उपचारकै क्रममा मृत्यु भएको हो ।

त्यस्तै मोटरसाइकलको पछाडि सवार कोडैना ५ का १८ वर्षीय दिपेश मुखिया घाइते भएका छन् ।